洪禮賢講馬：飛闖磅輕 後勁夠贏

港陌

　　第十場三級賽1200米。「飛闖」之前首次跑group，成績麻麻哋，嗰場路程係1400米，根本唔係佢杯茶，唔能夠作準。上場係第2次跑級際賽（1200米），出閘讓咗半臂，但拉士個勢唔係人咁品，尤其喺最後100米，仲以為可進一步迫近頭馬，總之點講都係，「蓮華生輝」讓佢5磅而贏唔到1個身位（撇開受困因素），「飛闖」個第三名好好水準嘞！

　　今場係讓磅級際賽，佢只負116磅，對手又差唔多係同一批，仲少埋隻「蓮華生輝」，能夠跑入前列嘅機會，又少咗一道障礙；排13檔起步，係要擔心，如隻馬又慢閘，處境一定比上場惡劣得多，但佢向來冇慢閘習慣，上場應該係偶一為之事件。當然，馬偉昌點樣處理起步後嘅攞位也重要，如沿路大外檔，實讓唔起呢批對手，到時點樣發揮係關鍵吧！

　　第十一場二班1400米。「家樂飛」喺外地夾過安國倫，配搭唔陌生，冇咗柏寶，唔代表唔可以繼續好。睇佢上場回升二班嘅演出，最後一程同「續領風騷」鬥埋一嚿，仲拋開第三名「陽明深心」，淨係睇呢場嘅賽事水平，佢喺二班唔會留得耐。今仗續跑1400米，近仗已跑慣跑熟，依然有靚位，形勢預期仍會好，成績唔難喼到。

馬會賽馬節目主持　洪禮賢