棟悉先機：傾力之城現真身

猪拉多纳

　　今日賽事焦點在兩項盃賽，遮打盃及沙田銀瓶，都係級際賽。唔少好馬有份跑，究竟係正正路路啲馬返嚟，定係爆爆爆！我諗都好睇大摩嘅馬成績係點，始終兩場賽事，佢出馬量佔總數超過三分之一，打晒骰咁滯，你話如果有甚麼閃失，賽果點會唔得人驚。

　　第二場四班1200米。「享耆成」連同今場在內，韋達已連騎3次，對1匹接連未出頭之馬咁重視，唔算尋常，坦白講，呢對騎練組合，成季只係合作咗十幾次，唔算特別黐得埋，韋冠軍居然肯為此駒騎完又騎，當中梗係有原因。如果睇隻馬上場仲係新嫩啲，所以，有冇畀對手阻到，佢都只係會得第三。寄望今仗加面箍會糾正到走勢，成績或更進一步。

勁闖駒勝在磅輕

　　第四場三班1000米。「勁闖駒」上場回到直路賽，以鼻位不敵「鷹之團」，真係冇說話好講，頭馬造出超快時間55.63秒，比標準時間快1秒，呢啲咪叫雖敗猶榮。今仗復於同一路程上陣，仲強配巫斯義，主力係咪馬房第一選擇「延續美麗」，我真係有點保留，唔排除係雙龍出海，但由於兩駒相差11磅，打句問句，都係捧「勁闖駒」。

　　第十場三級賽1200米。大摩五星齊齊落場，邊隻係主力？邊匹係花瓶？真係諗到頭都大埋，之但係，阿棟索到料，今場主力係落在「傾力之城」身上，係咪真唔敢寫包單，有時未跑都唔會落實，不過，以心為心，上場隻馬的確係演繹得好差，換上影子主帥，可能會現真身。

點買法

　　今日啲熱門馬之中，大摩及告東尼那批最得我歡心，獨贏2 x 3一於捧「勁闖駒」及「傾力之城」。重心連贏位方面，第四場形勢略易解拆，揸梗９膽，腳拖１、５、６，就呢3隻腳算嘞！

資深評馬人　陳華棟