借題發揮：兩場級際賽屯駐重兵 大摩擺明搶盃

猪拉多纳

　　時近季尾，剩下來嘅級際盃賽唔多，除了今日遮打盃和沙田銀瓶之外，只得19/6精英盃，盃王大摩今期採用馬海戰術，他在遮打盃出3駒，在沙田銀瓶更出夠5隻馬，如果話冇意圖爭奪兩盃，使唔使咁捧場？兩項盃賽派出8匹馬，真係幾難令人相信冇決心！。

　　連同今賽，目前距離煞科剩下12個賽日，唔係話大摩冇晒機會爭冠軍，但有6W嘅差距之餘，告東尼喼住成日有馬贏，反觀摩廐，近4、5期冇頭馬進帳，一來一回條數襟計，所以，唯今目標當然係向盃賽進軍。

　　遮打盃摩廐3駒之中，「火龍駒」及「爆冷」梗係焦點所在，前駒今場平磅再遇「威利旺旺」及廐侶「曬冷王」，形勢應逆轉；後駒貴為三屆盟主，今季又冇點用過，唔係留力等爭此盃，唔通仲有得等？

　　至於沙田銀瓶，5匹摩廐馬各有長處，有啲花多眼亂之感，不過「點心」和「傾力之城」係個人比較看好嘅賽駒，原因好簡單，一對馬上場短途錦標跑到胡裏胡塗，應放又唔放，再唔係就硬生生留到鬼死咁後，表現唔好根本與實力無關，雖然，今場未必兩駒一齊返嚟，估計當中應有1隻有胃口。