馬主論戰

猪拉多纳

遇弱旅最著數

　　今日呂廐雖然只得四駒上陣，但都有一定實力，話唔定有馬贏。睇好第二場「最著數」，初出已響直路賽跑近，上仗更交出凌厲後勁殺入Q腳，質素一啲都唔簡單，今次轉爭1200米，對手比上場弱得多，可以輕鬆補中。另外推介第七場「如願以償」，上仗只係輸少少畀「中環英雄」，證明三歲馬仲有分響手，韋達攞番嚟騎令人倍添信心，係今場穩膽所在。

張敬山

威利旺旺又捧盃

　　告東尼剛啱憑「讚賞」食尾胡之後，依家累積64場頭馬，進一步鞏固領先優勢，今日馬房成手惡馬，值得吼實。推介第四場「延續美麗」，前仗贏直路賽所造嘅時間，仲快過同日嘅「金德寶」，依家個分點會冇着數？一於捧場。另外鍾意第八場「威利旺旺」，上場出爭皇太后盃，輕鬆一放到底，五歲馬正值大熟黃金期，今次吼準遮打盃再上陣，隨時又捧盃。

任達華

重量級有權放到

　　何澤堯剛啱憑「自由勝」同「愛睦善」起孖，呢位後生仔嘅騎功有板有眼，真係前途無可限量。今日佢騎五駒上陣，雖然唔算多，但都有一定分量，推介第五場「重量級」，今季減分已多，上場轉跑田草都上名，證明近況唔曳，跑法主動嘅馬隨時可賺形勢，有權放到。另外鍾意第六場「紅褲子」，季內減咗唔少分，上場亦有復甦走勢，肯定想贏番場交代。

寇鴻萍、梁廷鏘