洪禮賢講馬：如願以償高一線步步闖自由港 家樂飛滿地金超群名駒超群如意

猪拉多纳

　　今日韋達復出，熱門坐騎幾多，成績會唔會成正比，真係一半半。反而，潘頓及安國倫，二人有部分邊線馬，其實幾抵博，值得細想。

重心場次　第11場　第二班（100-80分）1400米

　　「家樂飛」攞住近3仗2W1Q紀錄，喺今場夠晒惡，由於排埋好位，形勢更易掌握，就算係棄騎，依然要重視。

　　「滿地金」初出走勢喜出望外，唔係內閃及路短，好大可能攞到獎金，如跑過1場略為適應，呢次加程應到位。「超群名駒」及「超群如意」一對同主馬，前駒近兩仗最明顯改善之處係操控好咗好多，實在上場直路如早啲打開前路，以及肉緊多少，已經上到名，睇嚟係愈來愈進步；後駒4月中操練停過，埋尾大閘係未夠sharp，要睇忠心性格有幾大幫助。「川河勁駒」情況與前駒近似。「聖法理」和「活出美麗」，1隻好檔，另1隻有前景，可拖。

第1場　新馬　1200米

　　「良驥」正如上賽前所指，試閘係嫌出腳高，由於試1000米大閘較有根據，預期會跑得好，結果入Q已稱職，今場係睇過唔過到「名馬」。後駒靚樣、身價高，係蝦佢進度未夠。

　　「幸運金龍」唔似得初出時漏閘，即喺上場放入第二名，只要用得到自己段速度，加長200米而有1檔，仍有權放入一席。「永旺家」操咗冇耐就跑，有P算叻，早熟馬可跟。「履皇朝」贏谷閘姿態有點論盡。

第2場　第四班（60-40分）1200米

　　「最著數」及「享耆成」，一對馬里程好新，成績愈見好，如以陣上進展而言，前駒較顯著。

　　「龍船快」上場有貼，已指出前仗沿路劣勢而拉士尚有兩腳，至於上賽早段咁快係驚喜，如轉場後仍保留到此速度，或可入一席。「豹顯神駒」四班必超，只等加程。「飛躍之鋒」上場早段喺開便，扣到隻馬情緒「滾」晒，之後跑成點唔使理，肯轉番大場，可再畀機會。

第3場　第五班（40-10分）1600米

　　「濰坊」休出跑1400米，末段衝得好，進度重新起莊，加程配合，有望勝回一仗。「華獅」剛賽僅負，水準喺今場夠用有凸。

　　「越戰越勇」及「帝皇福星」上場幾乎同到，計取位賺蝕，後駒蝕得好緊要，若今場肯略作調校，有反先機會。「京城三寶」係擔心上場跑法被問過，五班根本超到阿媽唔認得！「幻想家」多馬放場合未必有利。「喜相逢」縮程有助，係長直路要考驗。

第4場　第三班（80-60分）1000米

　　東廐兩駒「延續美麗」及「勁闖駒」，揸住新近喺同程造55秒幾時間，冇乜對手夠跑。

　　「皇帝法令」初出得殿軍，嫌拉士唔多貫注，希望熱身後韌啲。「綠色寶」大閘去到尾段腳軟，初出有疑慮。「御鋒」和「領航人」，後駒較可取。

第5場　第四班（60-40分）1600米

　　「新領袖」上場喺內欄慳晒，返嚟冇得衝？定係前中段及直路處理唔好影響？真係兩睇。由於一早等佢跑番1600米，今場終轉回田草，博冷係時候。

　　「正榮」仲有冇上賽咁筍形勢，唔多清楚，不過，加磅後增添壓力係必然。「高分貝」唔斷纜，賽績要尊重。「進攻足球」跑法或繼續有利。「陽光普照」與「白蹄烏」進度未達十足。「好運得福」剛賽1400米明短，出閘又被撞過，直路仲衝得唔順，咁都第四，犀利！

第6場　第四班（60-40分）1400米

　　「快達小子」啱啱嗰場輸喺邊？！咪就係直路連塞兩次所致。肯換人，心態好，如有番前仗贏「幸運來」追勁，對手唔易抵抗。「音樂家」和「寶德」，上賽分獲二三名，後駒過早發力先會衝輸，實際表現其實更討好。

　　「信賴」失去上場黃金機會，今場10檔要睇際遇了。「紅褲子」如果直路唔係畀對手攔腰撞，上場唔贏都有P，值得追。「大地王者」贏完係要驚冇影，但可能仍跑到三三四四。

第7場　第三班（80-60分）1400米

　　「如願以償」耐冇跑一樣掂，預期跑過1場，狀態會更實淨。「高一線」場地正常，有埋快步速幫手，希望跑番好。「快利多」如早段快鬥快，同樣會受益。

　　「步步闖」上場末段遲遲撻唔起後勁，加程期望有突破。「自由港」首個大閘已有好印象，外地績又準，初出唔敢批死。

第8場　一級賽（3歲及以上）2400米

　　「火龍駒」平磅跑，唔使再負重，跑法未必似上場咁避忌，「威利旺旺」好難再慢慢放，可反客為主。後駒如冇形勢，充其量P格。

　　「爆冷」今季冇點真正搏過，嚟到季尾，跑大長途賺晒體力。「曬冷王」冇咗輕磅之助，唔易再挑戰到廐侶。「一言為定」長力未必夠跑2400米。

第9場　第三班（80-60分）1800米

　　「精奇」再跑此程係正路，但必先喺跑法上唔似大前仗，至會有表現。「印度光輝」、「喜蓮智星」及「有盈有利」，冇咩板斧，唔襟鬥，係靠檻及跑法爭入圍。

　　「火熱動感」加程會好，可能係過於樂觀，因之前幾場表現，嚴格嚟講，幾失望吓！「國中之星」如有步速之助，或比上場更有威脅。

第10場　三級賽（95分及以上）1200米

　　「飛闖」如外檔唔係影響太大，以佢上場蝕磅、漏閘仍追得咁好，今仗負輕磅，理應仲犀利。「傾力之城」及「萬事佳」，前駒剛賽「夢遊」一樣，係咪唔夠分量，宜睇多場；後駒排3檔，可能仍帶得出，有權再賺。「富貴金龍」磅輕，成績有望比上仗叻。「時尚風采」若果隻腳冇事，名次可望提升。「新力勁」級數贏晒，係睇吓外地返嚟第2仗跑得番幾多。

馬會賽馬節目主持　洪禮賢