德國U21細味葡萄

魑魅魍魉

31/05/2011
文： Mic少

今晚有場國際熱身賽，葡萄牙U21主場對德國U21，兩國大國腳都係世界級勁旅，但U21小國腳近年失威，同樣無法進身六月舉行嘅U21歐國盃決賽周。兩軍現時正處於重組階段，需要時間磨合，今仗屬於試陣性質，爭勝鬥心成疑，捧入球細。（有線155台周三凌晨零時15分直播）




葡萄牙青訓最光輝時期係九十年代初，以費高為首嘅黃金一代，但此後無以為繼，即使誕生巨星基斯坦奴朗拿度，但U21國家隊整體成績都係麻麻，更連續缺席○九年及今年U21歐國盃決賽周。目前呢支葡萄牙U21以打入二○一三年U21歐國盃決賽周為目標，球隊處於重組初段，百廢待舉，好難期望可以迅速有好表現。


09年冠軍成員上晒位


德國曾於○九年奪得U21歐國盃冠軍，但今屆無緣進身決賽周，好大程度上因為唔少主力已晉升為大國腳，現時呢批球員質素比較參差，較具睇頭只有緬恩斯中場賀治比同賀芬咸中場施巴斯坦魯迪。由於球季剛收咧，球員踢熱身賽心態難免會比較鬆懈，隨時Hea踢了事，細盤有1.82倍值得捧場。