德國U21歎葡萄酒飲大咗

魑魅魍魉

31/05/2011
文： 牛奶仔

今晚足智彩獨腳戲由兩支青年軍對壘，葡萄牙U21於主場迎戰德國U21，兩隊均無緣6月上演嘅U21歐國盃決賽周，今場熱身賽純粹試陣，相信會踢得比較放，一於捧1.88倍入球大。（有線155周三凌晨0:15直播）




葡萄牙U21一向名大於實，今次大軍只有士砵亭嘅丹尼爾卡列高算係踢過吓歐洲頂級聯賽，其餘都只係大會嘅二打六。之不過佢哋星味雖然唔多夠，但就同大國腳一樣擅踢進攻足球，近4場比賽共入咗9球，相信喺今場熱身賽都會繼續主攻。


德國近10戰入27球


德國兩年前曾捧走U21國家盃，可惜一班新秀未能接力，今屆連決賽周都入唔到，但論球員名氣同實力都遠勝主隊，特別係効力緬恩斯嘅攻擊中場賀治比，呢位小國腳隊長上陣9次即攻入5球，係入球保證，一眾喺德甲搵食嘅攻擊戰將，包括蘇古達柏素、穆拉柏及施巴斯坦魯迪亦都有入選，再睇埋近績，德國U21近10戰狂入27球，真係隨時靠佢哋一隊都開到大。