巴西盃決賽華斯高搶頭彩

港陌

01/06/2011
文： 巨高

巴西盃決賽首回合，由華斯高主場對哥列迪巴。今年華斯高聘請前巴西國腳列卡度高美斯之後，成績果然有進步，近三場比賽全勝兼只失一球。華斯高狀態大勇加上有主場之利，相信今場可擊敗哥列迪巴，1.8倍主W靠得住。 （周四早上8時50分開賽）


華斯高自從三月初不敵馬卡耶之後，至今已接近廿場未輸過，當中包括州聯、巴西盃及聯賽。華斯高已為巴西盃決賽而將球員狀態推至巔峰，首回合肯定會把握主場之利狂轟哥列迪巴。要留意嘅球員包括比拿度韋拉，呢位九十後球員連續兩場巴甲都有入球，絕對係主隊食胡人物。查實巴西老牌球隊華斯高自成立以來，從來都未捧過巴西盃獎座，最叻都係○六年取得亞軍。故此球隊好想「開齋」，唔使懷疑爭盃鬥志。

哥列迪巴走樣難靠

對手哥列迪巴今季曾取得廿四連捷，為巴甲球壇創下新紀錄。但未知球員係唔係谷得太過盡，最近五場表現突然大走樣，當中僅取得一勝，輪勢頭一定唔及華斯高咁好。暫時未知哥列迪巴會沉淪幾耐，故今場巴西盃唔好對哥列迪巴有太大期望。