洪禮賢講馬：魚與熊掌衍生美麗誤會 配搭或影響思維

魑魅魍魉

　　事情未去到最後，事前睇法會係肯定？否定？基本上，並無1個準則。歷史，只係講畀我哋知，以前發生過咩事，從而汲取經驗，但之後會唔會又係倒模咁出現，冇人敢寫包單。之所以，平衡，係幾重要，偏信則暗嘛！

　　從賽馬角度去睇，正如1匹馬，未跑過泥地，再睇埋成條父線，一眾哥哥冇隻喺田泥入過圍，如賽前否定該駒嘅泥地性能，錯不到哪裏，偏偏嗰隻馬落場跑贏埋，姿態輕易又時間快，而嗰隻馬叫做「一定爆」，今季4W嘞，贏泥地一役更造出該程季內第二快締速。

　　又例如，表面上1個騎師同場有馬揀，A駒B駒啱啱喺佢手上跑得好，魚與熊掌嗎？可能係美麗誤會，嗰個騎師可能喺不可兼得之下作出選擇，如果有法術，或者不知幾想即刻變到佢有兩個pat pat，一對馬騎晒。而呢齣劇目，啱啱禮拜三由韋達喺第七場擔綱演出了，佢跑「點石成金」，最後P都冇，「夢仙」則由安國倫輕勝返嚟。

　　從來唔建議對號入座，自己揀錯，眼拙要認，配搭係咪影響咗思維，唔否定有影響。至於賽果讓我們見識到兩駒陣上進度比較，「夢仙」跑出水準，末段好似入咗無人之境，而「點石成金」沿路盯緊假想敵，心態及姿態做啱，可惜直路衝落冇增速之嘛。

馬會賽馬節目主持　洪禮賢