高清睇跑馬：小鬥士換人補中

魑魅魍魉

　　第一場五班1200米草地。「小鬥士」去年12月一戴眼罩立即贏馬，該役為谷中1200米，接戰殺上四班，惜排十一檔唔易應付，早段用力搶放，致末段潰不成軍。打後兩仗出爭1400米，路程不合兼弱配純粹減分。前仗角逐四班1000米繼續弱配，卻能殺入季軍，未能放出焗住留後跑都有好表現。

　　「小鬥士」上仗後出戰總場次628五班谷草1200米，重遊勝途強配柏寶，被捧熱順理成章，若是輸實力無話可說，然而靠放之馬竟然被留住跑，鞍上人起步後推騎兩步便算，完全冇諗住搶放或進佔前列位置，不用最佳跑法，又沿途三叠蝕位，落敗乃必然之事。今次配安國倫，必有更佳發揮，順利帶出可望補中。

　　第三場四班1200米草地。「快樂無窮」未勝前早於同程跑近，總場次304跑第五，343場獲殿軍，之後改攻其他路程表現欠奉，兜了一個圈終於重回田草1200米，對上四戰全部出戰同程，共獲兩勝兩位。贏馬兩仗齋衝直路一段殺晒，尤其是前仗，直路初尚落後十多個馬位，極度劣勢下居然仍可後發先至，末段造22.25秒，第二快的「好辣椒」只造23.07秒，足足慢了零點八秒。而入位兩場亦雖敗猶榮，518場獲亞軍一役遇超慢步速，留後跑當然蝕底；至於上仗得季軍，早段突然跟得太前，未有用最佳跑法，仲要首次負重磅，絕對係高難度之作。周日只要再採用留前鬥後戰略，隨時又贏。

Sam