洪禮賢講馬：喜威寶漸信良駒四季玉峽生輝 明燈好利利旺當家爪皇盛水

猪拉多纳

　　一睇騎師王隔晚賠率，韋達一度捧到唔夠13皮，熱成咁，近期少見，今日佢多馬有冠軍相係事實，嚴格來說，贏兩W係唔及格。

重心場次　第9場　第二班（100-80分）1200米草地

　　「明燈」比較前仗同程入Q，孭少幾磅而繼續有好位，預佢會賺腳程，「好利利」未必一定係主力。後駒剛勝姿態及締速俱出色，上二班完全唔怕。

　　「富高勝」近三兩場皆有原因跑得唔好，切勿過早放棄。「旺當家」及「步步快」，今場未必對後上馬有利，爭腳居多。「活力名寶」加程有嘢睇，縮程則未必好。「爪皇盛水」虛分唔少，將來喺二班唔難贏，係擔心轉倉首戰，但見贏大閘姿態則有氣勢。　

第1場　第五班（40-10分）1200米草地

　　「金莊」退出後隔了約10日復課，早前試大閘全程揨住尚有走勢，影響應不大。「小鬥士」始終有班利，13檔則要睇早段擺到喺咩位。

　　「駿盈」及「厲行星」，或受惠今場中置及後追有利形勢。「小蜜蜂」跑法加埋11檔焗放，睇吓捱到邊度。「高駿」和「真如寶」，失準卻有資格憑後勁入圍。

第2場　第四班（60-40分）1200米泥地

　　「神殿」落四班回跑主項，安排夾好晒，如非不利追，對手唔易抵擋。「萬事綵」和「卡加大師」，位好夠速度，早段若霸到前列，已具上名本錢。

　　「飛躍之駒」外檔及轉場，並非冇風險，仲要視乎騎者會唔會一如慣性喺外叠蝕！？「風火飛駒」近期贏泥閘輕易，而上場喺直路中段仍有兩腳，轉場可能有生機。

第3場　第四班（60-40分）1200米草地

　　「快樂無窮」再遇「軒轅勇將」，負磅冇大變，最大分別係前駒冇咗好位，或一心留後等直路爆，效果可會比上賽好。後駒計死數應再W。

　　「駿方」稍嫌大閘表現過促，按近績則要揀。「好食德」3月中停過課，埋門兩大閘則覺反覆。「妙不可言」可用含蓄嚟形容初出喺直路發揮，肯換人及操練有誠意，咪睇小。

第4場　第四班（60-40分）1400米草地

　　太多馬有缺點，揀得嘅又唔覺特別穩陣，爆冷格；「樂融融」希望剛賽係偶發性賽績，之前仲連續兩場入Q，唔應該係咁曳馬。「神童」靠置前跑法，唔鬥得，排11檔，要睇早段搶唔搶到好位。

　　「多利皇」耐冇跑，上場出賽可當試大閘，信其能力則今場要開始跟。「雪米糍」與「好願景」，有能力，惜1隻有脾氣，另1匹輸外檔。「清風駒」P格。

第5場　第四班（60-40分）1800米草地

　　「中華寶寶」唔係楔埋便塞死，剛賽至少有P，如匆出夠體力，轉場一樣掂。「飛騰」加程2200米唔啱，跑回此程，威脅性大增。

　　「奔騰飛駒」係慢閘困擾啫。「危險英駿」啱晒位，上場亦只係捱個P，已感失望。「威騰駒」漏閘影響上場發揮，可以唔使理，班利馬如有長力，隨時贏得。「正榮」睇腳法改戰長途會好。

第6場　第三班（85-60分）1650米泥地

　　「喜威寶」與「金獅猛將」，最大共通點係上賽跑法超錯，今賽路程及配搭唔同，希望交出之前跑得好嘅水準（係驚後駒曾缺課一段長時間）。

　　「漸信良駒」上賽有揀，表現符合預期，再追。「玉峽生輝」一再喺此程追得吓，由於今賽唔係一班賽，又唔使負重，機會提升。「四季」愈見陣上心情放鬆，實力會續有進步。

第7場　第三班（80-60分）1200米草地

　　「首飾達寶」初出贏1000米太易，除非轉彎路程錯晒，若不，定可連捷。「翡翠海星」慢放兼有形勢下，上場打開勝門，好在今場仍有檔利。

　　初出PP「金鎸龍華」和「喜喜威龍」，前駒操練日子不及後駒多，大閘亦冇試咁多，不過，進度嚟得較理想。「人人醒」大閘迫落肯追，但仍未夠主動，加配件睇吓有幾大幫助。

第8場　第二班（100-80分）1600米草地

　　「國寶」太準，10場未甩過P，贏完試大閘，全程喺外叠好爽，如加重幾磅負擔得嚟，再W。「戶外名駒」如場地正常，前駒亦要忌三分。

　　「勁高手」132磅而又冇上場偏差，唔易再上名。「勇鋼」上場大半條直路斜跑，唔係好騎到，咪介意沿路好位，但末段湧唔到上嚟。「奇葩」上賽跑唔出水準，幾難解釋，惟前仗負重直路掃低對手姿態好勁，可拖一腳。「正毅」步速快，或有利追。

第10場　第三班（80-60分）1400米草地

　　「佳同」人馬從上場入Q僅敗已知夾，由於目前比前易留，除罩回到此程，仲好發揮。「中環英雄」多分未兌現，係擔心跑落要加程。

　　「驌龍」面對加分和升班，今場難度幾高，要睇進度。「風雲武士」跑法可能喺今場會賺晒。

　　「開心自在」跑法過於落後，要視乎賽事形勢。「智財」初出留得辛苦，直路頭仍有兩腳，續可留意走勢。

馬會賽馬節目主持　洪禮賢