阿根廷次貨讓唔起波

猪拉多纳

05/06/2011
文： Mic少

今日下午至夜晚繼續上演國際熱身賽，阿根廷將會作客波蘭，阿根廷日前以一比四慘敗於尼日利亞腳下，證明呢支由二線兵組合嘅「B隊」完全冇料到，而且仲要由非洲趕去東歐比賽，經過舟車勞頓之苦，勝算再打折扣，讓唔起波蘭，捧「讓球主勝」。 （有線61及64台周日晚11時直播）




阿根廷今次大軍陣容，並冇美斯、希古恩、泰維斯及馬斯真蘭奴等常規主力，取而代之係一批年輕球員及邊緣國腳，領隊巴迪斯達旨在考察呢班二線兵，希望從中挑選部分球員，與美斯等猛將，組成最佳人腳，出戰下月美洲國家盃。


阿主帥唔在乎賽果


因此，巴迪斯達根本唔在乎賽果，難怪上仗大比數輸畀尼日利亞，估計巴帥今場會繼續試陣，但呢批球員甚少機會合作，默契不足，實在難有作為。而且今場對手只係波蘭，但阿根廷贏波賠率竟然有2.25倍，可見呢班波屬於「次貨」，莊家都對佢哋冇信心。


波蘭多蒙特兵硬淨


波蘭擁有東歐球隊傳統硬淨風格，而且陣中不乏高質素球員，包括阿仙奴門將施捷斯尼，以及多蒙特三子後衞比薛斯基、中場巴拉斯塞高斯基及前鋒羅拔利雲度夫斯基，多蒙特能夠奪得德甲冠軍，三人功不可沒，亦證明佢哋具有喺歐洲勁旅立足嘅能力，今晚足以同呢支阿根廷「B隊」抗衡。