白蘭斯不變變出超級防線

猪拉多纳

06/06/2011


法國領隊白蘭斯話晒都係中堅出身，上任之後首要任務就係打造固若金湯嘅防線，佢哋近8戰保持未輸過之餘，夾埋仲只失咗2球，成功嘅秘方就係一條「不變應萬變」嘅防線組合！


阿爾拉米場場正選


雖然白蘭斯頭兩場領軍都輸波，不過佢並冇自亂陣腳亂咁試陣，反而繼續重用一班冇份踢上年世盃嘅球員，防線嘅變動就特別少，上任後頭9場嘅中堅組合，都係由里爾嘅阿爾拉米搭上羅馬嘅麥薩斯，直至因麥薩斯受傷，拉米上場嘅拍檔先換上聖日耳門嘅馬馬度沙高，至於左、右二閘亦多數以基捷基治及沙格拿二人擔正，變動少就自然培養出默契。




事實上，有唔少國家隊領隊都因為受到大球會阻撓，未能喺熱身賽徵召到最佳人腳出戰，好彩阿爾拉米同埋麥薩斯都唔係來自乜嘢大球會，但隨住麥薩斯來季轉投意甲班霸AC米蘭，相信呢對組合都唔容易喺往後嘅比賽踢足，白蘭斯點都要搵番個信得過嘅後備，先至有條件問鼎大型賽事錦標。