洪禮賢講馬：衝鋒槍 試準開火

魑魅魍魉

　　第六場三班1000米。「金紫荊」上場已經用嚟行頭，初戴眼罩喺同程爆冷勝出，究竟係配件功效大？換人騎乃關鍵？好難一概而論，可能係一半半都未定，總之上賽冇前仗跟得咁前，後勁亦強咗則係事實。

　　今次再揀，風險好大，因為佢之前贏嗰幾場，再出冇次得（就算翌仗跑勝途，同樣係P都冇）。但追多場，多多少少係謝路寶，另外，計帳面條件，冇加過磅，對手好多喺上場贏過，又繼續有內檔，真係唔覺輸蝕得去邊，希望今仗可打破勝後例叮嘅宿命。

　　第七場一班1800米。「衝鋒槍」近季好少喺谷草一班場合冇影，前季至今係得1場，不過，要記住嗰場係自己攞嚟衰（無啦啦擺前走）。而睇佢上季同程攞兩W，過程易到唔恨，當時極度忠心嘅「真叻仔」、「特樂寶」，係完全無力抵抗。

　　到咗今季，跑咗同程1場，又係以外叠風冚姿態超越對手，最後幾十米仲贏到收韁，強如遮打盃盟主「火龍駒」，一樣冇得鬥。贏完跑咗兩場田草，冇成績交出好正常，隔兩個月再出，期間工夫冇停，5月試夠兩大閘，贏1700米谷閘嗰次，大有預演真跑嘅味道，轉完彎拉出大外檔，輕易贏幾個身位返嚟。睇準備程序及手法，再睇埋近季賽績，「衝鋒槍」點會錯過呢場盃賽。

洪禮賢