巴西傳奇幫後輩執靚形象

魑魅魍魉

07/06/2011


即將迎接告別賽嘅巴西傳奇朗拿度，尋日特意入營探班，佢仲強調自己掛靴後會全力發展9ine經理人公司業務，目標係搞好後輩形象！




一生最愛足球，「大哨」希望自己掛靴後都唔使同至愛分開，不過佢唔想做靠轉手巴西天才新星搵錢嘅無良經理人，相反係幫佢哋開拓發展空間，搞好佢哋嘅公共關係同個人形象。朗拿度仲重申自己唔係掛名老闆：「我仲有好多嘢要學，但我會好努力去參與公司日常運作。」




現時擁有45% 9ine股份嘅「大哨」，佢拍檔係著名公關公司WPP及一間巴西企業，佢哋手頭上已經有尼馬同盧卡斯洛迪古斯兩大新星，嚟緊就想簽埋卡卡同甘素。朗拿度透露佢哋公司長線目標係希望透過2014巴西世盃同2016里約熱內盧奧運開發更多商機，一副生意人口脗，點到你唔服？