日本糟質捷克「遊客」

魑魅魍魉

07/06/2011
文： 九叔

話就話係場盃賽，但係麒麟盃日本對捷克呢場波，根本就係友誼賽性質，贏輸都冇乜所謂，正因為咁，日本個1.65倍主W反而諗得過，事關佢哋今晚要幫新星宇佐美貴史過檔拜仁造勢。（開賽時間：周二晚6:30）


拍住本田圭佑專用鏡頭追蹤


德甲豪門拜仁慕尼黑睇中19歲嘅宇佐美，已經唔係一朝一夕嘅事，近排仲傳會先試用1年添，可能基於呢個原因，TBS今晚直播場波嗰陣，就專門安排一個鏡頭，全程追縱呢條o靚仔，日本傳媒話歷史上有咁嘅待遇嘅球星，就只得三浦知良、中田英壽、本田圭佑三個，宇佐美今鋪第一次代表大國腳就咁受關注，肯定係新一代國寶。日本隊主帥沙哲朗尼都好識做，佢除咗話繼續試「3-4-3」陣式之外，講到明會用宇佐美擔正，拍住本田圭佑、岡崎慎司做三箭頭，似乎想畀個細路騷吓哥利，等拜仁早啲簽佢。




本來論真正實力，今晚作客橫濱日產球場嘅捷克，同日本絕對有得鍊，衰在佢哋今次踢麒麟盃，完全抱住遊埠心態，最初揀咗22人，冇路斯基不特止，臨時又有兩件退隊，剩番20人去日本襯吓，成隊波9個外流球員最大名氣就係龍門施治，跟住就數到利華古遜中場卡特歷個朵叫做響啲，佢哋上場波連秘魯都贏唔到，只係0:0悶和收場，今日撞啱東道主日本要幫宇佐美造勢，好想贏波捧盃，捷克呢勻想唔輸都難。