借題發揮：三駒圍攻谷草最後一盃方嘉柏雄霸銀瓶

港陌

　　今晚跑馬地銀瓶，係季內谷草賽事最後一項盃賽，邊一路人馬可以埋齋，會唔會係盃王大摩，一啲都唔奇！「卡達聖」及「包裝選擇」，老氣一點形容，俱為獨當一面之馬，是但1匹勝出，都唔可以話係底出。之但係，無論邊個想爭盃，點都要問過方嘉柏。

　　方仔派隻「衝鋒槍」仲唔夠，加多兩駒齊齊爭吓，表面上，「藍天」和「極品絲綢」可能低少少，或有護航之嫌，但細心去度，又唔多似咁簡單，話唔定，3駒會喺末段有得鬥。

　　「衝鋒槍」往績有幾掂，其實已經唔使點去誇獎，一睇同程往績，完全係路程專家嘅典範。像大前仗贏同程之役，第二名為遮打盃盟主「火龍駒」，但去到末程，根本冇招架之力。如果今仗唔係重磅，十拿九穩矣。

　　至於「藍天」及「極品絲綢」，前駒同程曾入圍，當時輸「衝鋒槍」不遠，要是今場因受讓嘅磅位多咗，可能有反先能力。「極品絲綢」今季成績與預期不符，1W未到手都算，居然一席位置都冇，其實幾難交代，但另一方面，冇話點真正搏過，到季尾賺了體力，蟲變龍，唔係冇可能。

Jack