棟悉先機：勁飛駿逢10晉1

魑魅魍魉

　　刨馬時候有點不知所措，揀正常場地之馬，定係變化地馬好呢？因為天文台指出今日可能有幾陣雨，一個唔好彩，跑跑吓先嚟落，影響真係幾大。所以，唔好話阿棟多事幹，今日如要玩馬，都係玩即場算嘞，過關唔好預我，費事天有不測之風雲。

　　第六場四班1400米草地。「寶德」現時係跑弗，實力未必可在四班言惡。老實講，近兩仗入圍水準係要諗清，佢近兩仗跑獲季軍，左左右右只係未成熟嘅「音樂家」及「明旺」。好彩今場唔係再冇運，終於唔使排大外檔，希望有助發揮，從而打開勝利之門。

自由萬歲輕磅W得

　　第八場三班1600米草地。「自由萬歲」上場嘅處境，真係唔多夠運，明明在內欄好好位，順風順水賺腳程，唔知點解中途都會「仄」到自己，搞到亂咗陣腳一大輪。不過，另一方面，證明前仗勝後被加了分，仍沒有多大阻力。今仗上到三班，60分明明可報爭四班賽，係要挑戰強敵，唔會係死充！肯定練者係貪匹馬可負輕磅，如果本身係夠班，今場恃住113磅，贏埋唔奇。

　　第九場三班1200米泥地。「勁飛駿」唔係好肯定評分有冇嫌高，但可以肯定，目前匹馬泥地性能略比草地好多少。今仗唯一唔好就係排10檔，小將吳嘉晉早段如何處理將是關鍵，但睇佢贏馬有板有眼，唔係手忙腳亂之十磅仔，我自己一於唔諗咁多，佢點跑，我唔會再鑽牛角尖。如果嘉晉仔搵位好而又騎得郁，唔係冇勝望。

點買法

　　因為比較鍾意「自由萬歲」，WP係揀呢隻，隔夜有接近10倍，筍盤！連贏則揀第六場，「寶德」QT馬膽， 配腳比較喜歡７ 、１１ 呢一對， 如果要博大堆頭，3匹大冷門，４ 、９ 、１０千祈唔好睇小。

資深評馬人　陳華棟