高清睇跑馬：鷹之團難尋對手

魑魅魍魉

　　「鷹之團」今季首兩戰均得亞軍，一仗慢閘一仗賽前曾缺課，統統有合理敗因；前仗操得兼出閘快即打開勝門，莫講要開鞭，就算推騎亦係咁意，而畀佢遠遠拋甩的「最著數」接戰亦補中。

　　上仗「鷹之團」升上三班，並於總場次614再跑田草1000米，埋門一樣重飛搏殺，最強對手「勁闖駒」一早咬住子彈馬「御鋒」，之後加速衝刺強勁，眼看勝利在望，「鷹之團」卻憑凌厲後勁追上贏馬，末段締出21秒74之餘，55秒6更是今季田草直路賽的第二快時間，可見這次再跑強項對手難尋。

　　「喜惑」至今五戰共得三冠兩亞全入Q，由於頭兩次均做阿二（首仗頭馬「沙紙」之後因體內含禁藥被取消資格），第三仗即加眼罩並且一擊即中；接戰做番二哥，全因頭馬「禮尚往來」實在太勁，何況「喜惑」要讓牠十多磅及排十二檔，沿途被頂出外叠冇遮檔，際遇大有不同下結果敗於「禮尚往來」個多馬位。上仗於總場次625增程至1400米，排十檔負重磅下一樣贏馬補中，優厚質素表露無遺；今仗初升二班肯定無阻力，易配楊明綸兼磅位大減更是如釋重負，穩食尾胡。

Sam