洪禮賢講馬：活力飛駒 縮程啱追

港陌

　　第六場三班1200米。「沙紙」初跑谷草入Q，整體時間係不及當晚另1組頭馬「聚有盈」，呢次要同場對戰，可能唔係易啃。而佢喺嗰場同「夢仙」差唔多沿路係拍拖更，直路同步發力卻被彈甩，最終只係爆贏「精靈勇駿」和「帝豪名駒」，或許凸顯唔到指標性與跟進價值。

　　如果純粹以佢自己嚟講，當時表現出嘅水準，的確比喺田草嚟得有競爭性。假設今仗加眼罩，強化到早段前跟力，同時提升到尾段纏鬥力，加埋跑法喺B欄1檔預會賺晒，唔係冇可能與今場「聚有盈」、「歐洲動力」等駒，喺末段鬥一番。

　　第七場一班1000米。「活力飛駒」因為過百分，季內長期唔係跑級際賽，就係田草高水準短途，高攀唔嚟可理解。如果以今場賽事質素嚟講，會係佢近3場以來，比較容易應付嘅1場，起碼冇啲過110分嘅「點心」、「蓮華生輝」、「金德寶」同佢一齊跑。

　　當然唔係對手弱咗就實益到佢，像3仗前一班谷草1200米（C欄排1檔），在大半程喺內欄中間靚位，返到直路可以一步都冇（嗰場頭馬一直喺佢前面），賽後驗過又冇事冇幹，真係唔知輸咩！惟今場縮落此程唔排除有幫助，若果又有之前喺直路賽跑入殿軍表現，要喺呢場佔一席唔難。

馬會賽馬節目主持　洪禮賢