借題發揮：成績表靚仔 依然冇欺場 徐廐搏得就搏

魑魅魍魉

　　季尾時分，個個吼住告東尼及大摩，你一拳我一腳，尚有蔡神仙偶然加入戰團，對於爭冠3人組的成績，固然會對馬迷有切身利益，試諗吓，如果3大巨頭成日冚旗，仲要喺沙田賽期，影響肯定深遠，在公在私，點會亂嚟。故此，嘜住佢哋唔係錯。

　　雖然有部分馬房冇嘢好爭，冠軍又遙不可及，又早已贏夠數有凸，基本上，鳴金收兵冇所謂， 可提早抱住唞暑心態。但3個華人倉口姚、葉、徐依然冇欺場，喺5、6月仍不斷有馬贏。就如徐雨石馬房，5月起計已取9W，唔係個人單季最好成績，但已經係近3季最多，成績表有晒交代，子彈留番啲等下季，人之常情，不過，呢種情況又唔多見，「桂花飄香」贏完再贏， 而「好得意」及「中華寶寶」季初已係先頭部隊，季末仲贏緊，鬥志好到唔知邊度搵。

　　今期此廐出馬少少，兩駒咋，「期望」及「福到財星」，能否延續近期連勝紀錄，好難講噃。不過，「期望」減分減到過晒籠，就真係事實，博佢縮程反彈又何妨。而「福到財星」，連續3場跑得好，作戰狀態有喺度， 依然跑拿手1650米，點解唔信。

Jack