高清睇跑馬：蓬萊仙子把握大

魑魅魍魉

　　「贏啲啲」落番五班表現特醒，大前仗於谷草1650米排十一檔，一樣後追虎虎有威得第五；接戰跑泥地1650米，留得極後但仍追入亞軍。上仗於總場次646跑谷草一哩，排一檔但起步未夠進取，失去先機下全程跟住第六、七位，兼且步速慢得緊要，你叫牠點追 ？ 入直路後牠由內檔移出外叠蝕位追趕，最終追入三甲難度極高；今次搵柏寶騎呢匹後上馬必合，上周騎者過檔親試泥閘夠重視，明顯已露搏殺手影。

　　「蓬萊仙子」上季三歲已四W，起初留前鬥後，之後跑法變得彈性，跟前走靚位一樣冇問題；今季於十一月尾復出，頭兩仗全無走勢，以為評分飽和之際，一月尾卻於1400米快放下殺入季軍，輸畀「甜將」同「勁飛寶」；接戰改攻谷草及初跑1650米，出閘後即一放到底，輕鬆擊敗「鵬力洋洋」及「闊袍大袖」此類谷戰好手。之後未有頭馬進帳，但近兩仗跑1400米共得亞殿各一，次次不敵超級馬，其中上仗於總場次605輸畀「國寶」跑第二，但該駒再出再贏，足證戰績出色。

　　今戰「蓬萊仙子」跑番現時最有把握的谷戰，排埋五檔起步，真係想輸都難。

Sam