洪禮賢講馬：一團威火熱動感朝東飛駒站站名牌 勁擊超勁精神福到財星都靈一號

魑魅魍魉

　　谷草B欄賽事，沿路貼欄慳位係爭取表現嘅不二法門，這點幾難喺季尾無端端改變。講到騎師方面，今晚潘頓及黎海榮各有千秋，勿看輕。

重心場次：第6場 第三班（80-60分）1200米

　　「沙紙」剛賽「隔空」與今賽同場「聚有盈」對過，兩場時間以後駒較佳，要計嘅係前駒當時首次跑谷草，同埋，今賽加罩及1檔會起到幾大作用。後駒如果用唔番上場跑法，可能又打回原形，停留喺前仗嘅戰鬥力。

　　「醒目精英」質素喺三班唔會綁手綁腳，呢系馬初跑谷草成績亦佳，唯一要顧及傷過有幾大影響。「銘記心頭」跑同程經常守好位而返嚟冇P，暫時唔覺喺呢班突出。

　　「吉利大師」初出已揀，但升班、轉場及11檔，的確幾難搞。「日月暉華」唔係忽然慢閘，上場或有殿軍，其實前仗贏B欄此程爆得勁，跑得番，可入腳。

第1場：第四班（60-40分）　1000米

　　「勝在分秒」四班此程往績可靠，係睇9檔令早段擺到喺咩位置，如不太蝕，仍有勝望。「生豪」縮程及轉用跟前跑法收到成效，唔使太介意上場第三名輸得遠，只因陣上走規已見明顯改善。

　　「好妙星」失準到唔恨，不過，早前B欄同程埋欄慳位嘅機遇，或可在今場再發生。「包裝小子」上場前後都曾試過谷閘，5月中嗰次有用配件，試得比前順滑，等到今時今日先轉場及加嘢，小心變身。「當旺」上場尾段塞車才會冇前四名，今場仍可再跟。

第2場：第五班（40-10分）　1650米

　　「贏啲啲」如果剛賽出彎蝕少啲，或可進一步威脅頭二馬，希望換人會交出更佳演繹。「創出傳奇」立心隔番一排而做嘢嚟跑今場，如因今場可能出現早段略快環境，末段佢會有行。

　　「封面」情況如一，只係實力比前駒稍不及。「厲行星」1200及1400米成日追唔切，加程至一哩，不失為好方法。「無敵福星」唯一敵人係自己冇兩劑性情。

第3場：第四班（60-40分）　1200米

　　「萬事綵」前仗此程黐欄慳位跑，唔係咁滿意隻馬自己喺途中及直路嘅表現，唯有寄望回夠氣，有番之前四班一線馬本色。「超晒班」馬鞍鬆一樣贏，難得一見奇景，嗰晚利放有份推波助瀾，但維持到速度亦唔易，只係今場加咗磅，冇咁大優勢。

　　「金勝福星」上賽殿軍證明唔到啲咩。「龍得風雲」過去四班好少唔喺前幾名返嚟（10場得3場冇獎金），最好拖埋。「事事順意」如適應到谷草，贏盡級數。

第4場：第三班（80-60分）　1650米

　　「一團威」上場入P，演出符合預期，今場基本條件冇變，追多場。「站站名牌」及「朝東飛駒」，好有可能因今場步速慢，獲得有利競逐環境。

　　「開心自在」曾在谷草1200米上名，一哩問題不大，可惜一遇冇步速場合，佢嘅後勁好難爆得出。「火熱動感」剛入Q有難度，因段速唔快，所以，就算今場一樣，佢仍有本事克服。

第5場：第四班（60-40分）　1650米

　　「勁擊」如因休出第2仗關係，佢段後勁能比上場強大（大致與今季贏馬前相隔日數差唔多），加上，轉用安國倫又會跑高啲，可能突如其來。「超勁精神」及「福到財星」演出準，正路腳。

　　「心路」剛賽忽然有番應有後勁，賽績波動性好大，難捉摸。「都靈一號」加脷帶令陣上聽話咗，假設佢唔係短途性能，而今場又肯續用留後跑法，可能有截然不同表現。

第7場：第一班（110-85分）　1000米

　　「活力飛駒」有級數，此程又未必會比1200米曳，未必唔夠鬥。「風火神駒」驚地慢上場至唔揀，而贏馬姿態好有說服力，佢早於首季已曾在此程跑得好，轉場應不怕。

　　「此時此刻」返主場，排檔唔錯，有番晒殺傷力。「勁勇士」係怕缺課構成嘅影響（5月中起曾放慢了工夫）。「風之子」又係準到痺路程專家。「美猴王」和「錢照贏」，檔衰但有卡士，要拖埋。

第8場：第二班（100-80分）　1650米

　　「蓬萊仙子」演出穩健，跑法預期喺今場好跑，三甲馬。「何方神聖」賽前曾試1700米谷閘，有晒鋪排，本身又有級數，係睇吓之前不良於行有冇手尾跟。

　　「快人快語」及「易搏贏」，有冇得衝，好倚賴前中段夠唔夠快。「活出美麗」初出巳跑到錯晒，完全唔使理，真正能力及進度，應以今場作參考。「鵬力洋洋」實力會係幾匹路程專家之中略低之一，邊線腳。