洪禮賢講馬：滿綵齊晒條件

魑魅魍魉

　　第十場二班1200米泥地。「獵豹小子」連贏3場此程，冇1場真真正正鬥過，首勝嗰場贏得冇咁遠，末段大有睇住「皆大歡喜」嚟食之感。之後兩場取勝姿態，的確係愈嚟愈誇張，締速快而一再掟甩對手，泥地狀況正常，佢又係咁贏，跑濕慢地，佢依然係以大人同細路玩嘅feel咁大勝。用時間、用姿態去評估，升上二班點會應付唔到，況且，泥地班次壓力係冇草地咁大，對此類當起年青好手嚟講，更加濕濕碎。

　　數勻同場對手，除咗「旅英駿駒」及「相見歡」，季內贏過一班泥地賽，再冇邊匹馬賽績較「獵豹小子」亮麗。但計埋賽事中跑法嘅靈活性，前兩駒與佢相比，自由度係冇咁大，加上，佢又唔係排衰檔，正常情況下，前中段取位係與近仗相近，唔係忽然走樣，拉士幾難會畀對手威脅到。

　　第十一場二班1800米草地。「滿綵」上場跑馬地銀瓶，蝕分跑、走位笨笨哋，末段仍有悅目走勢。前仗田草2000米，出彎前唔走，畀頭馬「活力奔騰」走先，仲喺直路頭畀人冚埋外移出路（賽後有問過跑法），意識及臨陣上嘅問題，或者係策騎指示及初跑2000米吧！唔再挖了。今仗降班、轉人、改場地及檔靚，轉變冇乜邊樣唔係好，131磅可能係負累，都應該唔難有P。

馬會賽馬節目主持　洪禮賢