高清睇跑馬：勁贏晒收復失地

魑魅魍魉

　　「快馬當先」今季連場跑近，十次上陣僅兩戰冇獎金，累積一冠三亞兩季，尤其是改攻泥地後，表現相當突出。總場次387，此駒首度出爭泥地一哩，結果即在紀仁安胯下跑入一席第三名，證明泥地性能出色；之後分別在泥地一哩及1800米再添一季一殿，演出穩定。

快馬當先添食

　　上仗總場次597，「快馬當先」再爭泥地1650米，排十檔起步後，一早進佔前列位置，全程走二叠咬住前列馬，入直路望空後立即突圍而出，最後二百米愈衝愈勁，結果以近四個馬位彈甩亞軍「贏啲啲」，造出1分39.53秒的極快時間，反映進步良多。五歲馬此際大熟大勇，賽後只加八分，仍可再戰五班賽，簡直虎入羊群，要添食冇難度。

　　「勁贏晒」初出跑田草1200米，全程走外叠仍上名，早已反映質素上乘。點知翌仗再跑同程，遇上超慢步速，頭兩段造24.89、23.33秒，對後上馬極之不利，加上此駒又走外叠蝕位，落敗理所當然。

　　上仗總場次573，「勁贏晒」增程跑1400米，柏寶續用留前鬥後跑法原本冇錯，但騎者太過保險，因怕擠阻全程走三、四叠，去到彎尾更走出五、六叠，蝕位甚多下最終以短頭位輸給「自由萬歲」屈居第二，有點不值。汲取過此戰教訓之後，相信今戰柏寶必有更佳發揮，加上「勁贏晒」跑過一次1400米之後，再跑同程應該有更強威力，同場對手實力不算強，有力在此打開勝門，值得追多一次。

Sam