鹿角主場掃落葉

魑魅魍魉

18/06/2011
文： 走肖

「日職最強」鹿島鹿角地震後首次返主場作戰，竟然以0:1慘負甲府風林，淪落到要護級認真令人心噏，好彩鹿島鹿角今晚喺主場對磐田山葉賽前，國際足協大發慈悲出手打救，派錢畀佢哋修復主場同練習場，相信全隊會士氣返晒嚟，開1.68倍主W報答國際足協恩情。（now634及660台周六晚6:00直播）




東日本地震中，仙台維加泰同鹿島鹿角係受影響最嚴重嘅日職球會，但講到聯賽戰績，兩隊就天同地比，維加泰有5勝5和排第2位，相反鹿角得2勝2和4負要護級，而且受到地震影響，今季鹿角收入大減，高層同球員都勁擔心，近期佢哋狂出精品，就係希望球迷買多啲嘢開拓財路。


獲捐錢修復球場


之前鹿角借用國立競技場做主場，氣勢始終差啲，日前佢哋返主場出戰，都係得7,810名球迷入場，球員作戰心情難免更加受影響。不過咁，國際足協宣布捐650萬歐元（約7,234萬港元）畀日本，當中450萬歐元要嚟畀包括鹿角在內嘅受災球會，修復主場同練習場設施，有人打救隨時撻番着。


山葉主力被召踢U22


雖然鹿角有前鋒大迫勇也被日本U22徵召，但代替佢嘅田代有三入球效率仲高，上季外借到山形山神都有10個聯賽入球，何況山葉有前鋒山崎亮平同中場山本康裕入選日本U22，佢哋係球會必然正選，今季夾埋聯賽入5球，影響更加大，加上近6次聯賽作客鹿角得1勝5負，要唔過。