棟悉先機：羅馬奔騰實力超班

猪拉多纳

　　沒有韋達的日子，柏寶一再成為鑊氣騎師 ！ 有冇咁翹，韋達復出，柏寶反而激發出一股鬥志，呢點阿棟唔會排除，總之，今日佢兩個啲坐騎，既熱而為數又多，如果有乜「依郁」，作為普羅馬迷，散場真係會喊得一句句，所以，希望佢哋醒醒定定。

　　第三場四班1400米草地。「勁贏晒」上場叮噹馬頭衝輸畀「自由萬歲」，如果該役排檔及早段取位好啲，根本已經贏咗，不過，呢個世界冇如果！輸了就輸了。今仗加眼罩，幫唔幫到？冇話實得。但隻馬喺控制方面未完善，則從上場早段睇得好清楚。只要戴眼罩收好效果，而賽前曾缺課嘅問題又唔係嚴重，應該可以贏番場。

　　第四場三班1200米草地。「皇帝法令」跑兩場直路賽，分獲亞殿軍，表現出適應環境快嘅優點。至於上場入Q輸得比較遠，始終係對住當勇嘅「勁闖駒」，加上，頭馬全程在有利跑線，前駒末段未能進一步威脅，大可理解。

　　今仗轉到1200米，看腳法會更合發揮，而蔡神仙肯為隻馬連打3次王牌出賽，務求早交代心態亦幾明顯！

前仗久休復出跑近

　　第七場三班1400米草地。「羅馬奔騰」前仗唞咗大半年復出，喺此程得第四名，上場再跑成績大倒退，原因係氣管有痰，跑輸唔使計。要計就計前一場， 最後輸唔到半個身位畀「魔幻大師」，後駒最近已兩W，照秤的話，前駒喺三班邊有可能唔超！


點買法

　　由於柏寶手風唔多「老利」，所以，獨贏過關唔敢搵佢嘅馬，都係用「皇帝法令」及「羅馬奔騰」嚟射較好。講到重心QT 場合，第七場比較多實力馬， 選擇範圍冇咁大，或會易中啲。


陳華棟