洪禮賢講馬：自家威仔仔女女萬人迷駔驍駿駒 獵豹小子朝東精英大把在手旅英駿駒

猪拉多纳

　　韋達復出，柏寶唔使再成為焦點所在，而前者多駒備受重視，求神拜佛唔好似之前兩期嘅柏寶，如果唔係，今期嘅牽連可能更大。

重心場次：第8場　三級賽（95分及以上）1400米草地

　　「川河勁駒」跳班跑group，單用上場輕勝姿態未必夠撼，有埋輕磅可能有價講。預期今場早段唔會太慢，佢守好位跑法將有得着，應有三甲。

　　「新力勁」臨老不斷上試高位，一日未真正搏散，依然要睇住。「步步穩」級數贏晒，此程比1200米適合得多。

　　「友誼至上」唔係完全唔在狀態的話，跑G3好有牙力。「金獅威將」上場輸地淋唔使計，今次場地正常又有讓磅，早段扯得快，佢有得爭三至五名。「傾力之城」如果又似上場跟「萬事佳」跑法，最多只係會接近。

第1場　新馬　1400米草地

　　「幸運金龍」慢放策略喺今場一樣用得着，既然上賽已拋甩晒後面對手，如果唔係1400米莫氣，有望贏番場。

　　「路路好」剛仗陣上喺中途周圍撞，只可寄望加眼罩有用。「牛精威旺」頭兩個大閘睇完唔開胃，最近贏谷閘則認真考驗後勁，喺陣上交唔交得出則兩睇。「天翼」試跑及試閘唔覺進度嚟得快。

第2場　第五班（40-0分）1650米泥地

　　「快馬當先」位好仲易跑，係要諗吓贏完hea咗一排先復操，會係好事定壞事？！「冰火」及「百威紀錄」，之前同程一Q返，計能力比同場好多馬優勝，而今仗檔好會對發揮有助。

　　「兵奇臨」和「華劍寶」，單一跑法，在今場未必啱夾。「博利好」與「年年開心」，泥地如有得追，後勁好好使，尤其係前駒。

第3場　第四班（60-40分）1400米草地

　　「勝利旋峰」降班即轉場及加程，而早於上季已在此程入P，性能唔擔心，有埋1檔，肯跟番前啲，可能由頭賺到尾。「勁贏晒」難估計之前冇操幾日係發生咩事，如純粹用上場賽績的話，梗係超晒。

　　「傑出君子」強配但排13檔及冇磅減，P望較高。「乘奔御風」因外檔令上場早段焗留後，末段略遲至有位上，仍追番唔少，證明長力ok，假設今場7檔會改用中置跑法，有權變身。「輕越直前」加程或令早段較輕鬆跟前，應有成效。

第4場　第三班（80-60分）1200米草地

　　「皇帝法令」轉至1200米，又唔使再對路程專家「勁闖駒」，有番晒優勢。「按一按」4個幾月冇跑，復出1400米頂到最後百幾米，演出厲害，開氣後跑短200米冇壞。

　　「寶成智星」分數回到季初入Q水平，又唞番成個月至出，唔係冇條件。「駿蹄飛」田草盲門，但上賽此程追到差啲有P，仲要呢批對手冇上場咁叻（更有10磅減），有邊線機會。「新力飛」早已說過暫時進度未足以令能力翻一番，除非好多對手跑得差，才有望入圍。

第5場　第四班（60-40分）1400米草地

　　「多利皇」上賽前講過，前仗視為大閘算嘞，結果開氣後加程即入Q，好開再追。「陽光王子」上場跑到冇P，就當係內欄塞死就算，還望今仗換人會唔同。

　　「金鑛龍華」早已認定係超班，有基本狀態已夠爭，而轉馬房後，重新執番啱啲配件，又好彩排到內檔，只要留得好，將可見識到佢有幾本事。「紅珊瑚」啱啱嗰場唔認為全因內閃影響，騎者直路頭發揮亦有誤，轉番梁家俊，會有期望。「大地王者」贏完即走晒樣，只因夠膽死出閘開始錯到入直路，唉，今仗9檔難估攞位，但有賠率可一定要拖。

第6場　第四班（65-40分）1200米泥地

　　如果場地正常，唔係一味利追，形勢上，今場可能「仔仔女女」會比「萬人迷」好。「自家威」四班泥地此程賽績太勁（兩場贏晒），如利放，佢比前兩駒更有冠軍相。

　　「添福駿驥」睇上賽沿路擺位，明顯唔想喺馬林食沙，直路有咁開飛出咁開，能狂追再次證明啱泥戰，只係怕今場早段又落後太多。「駔驍駿駒」未識留力，但因落班，唔使太介意。「大家勝利」及「天賜福星」備戰工序甩咳。

第7場　第三班（80-60分）1400米草地

　　「勁力」由兩仗前亂晒籠都有P，已肯定佢太有質，兩W後上三班，仍覺未到頂。「自由港」跑到第2仗，再難「恰」到佢。

　　「羅馬奔騰」健康有事，剛敗可抹掉，今季初出輸少少畀「魔幻大師」，喺今場實夠爭。「高一線」係馬房長期冇腥氣打窒。「勝利之星」唔見得初出係靠內欄慳番嚟入Q，因為隻馬自己連直線都未識跑，純打天才波，再出有幾大幻想空間。

第9場　第三班（80-60分）1800米草地

　　幾駒經常對戰，跑得好唔好，視乎發揮及步速，如正正常常，「佳景良駒」和「歡欣滿載」應，可秤先。

　　「喜蓮智星」加磅及換人，本來冇得再存奢望，但今場可能又係得佢慢放，希望前中段拖得慢，走入一席。「印度光輝」與「精奇」，前駒外檔係風險，怕留得辛苦；後駒唔明點解上場一步都冇得衝，只能納於邊線。

第10場　第二班（100-80分）1200米泥地

　　「獵豹小子」贏完又贏，泥地好手一日未停步，咪設頂。「大把在手」準字當頭，加上113磅擺前走，喺季尾威力太大。

　　「朝東精英」如處理上比上場醒目，好好運用那段爆炸力，有權掃晒。「相見歡」和「旅英駿駒」，前駒重磅，後駒跑法單調，俱欠殺着，位望居多。「聖迪達」計實力，正路係有得爭，可拖腳。

第11場　第二班（100-80分）1800米草地

　　「滿綵」前仗出彎老襯，畀「活力奔騰」走先，令自己陷入困境，由於今場唔使蝕分，又改戰此程，級數和能力大得多。後駒喺呢個磅仍然有得爭。

　　「喜競寶寶」回到長途，比起中程好跑好多。「戶外名駒」、「續領風騷」，同程性能要考慮，如二揀一則要後駒。

　　「智多飛」剛賽輸到不明不白，難有信心去跟。