世少盃「爛橙」揀唔過

港陌

21/06/2011

香港時間周三凌晨及早上上演世少盃第二輪分組賽，今屆賽事都幾多冷門，好似A組嘅荷蘭，首輪分組賽就以○比一不敵剛果共和國，明早荷蘭遇上另一神秘球隊北韓，以「橙衣兵團」上場嘅表現，今場隨時有暗湧！


北韓揭幕戰以一比三不敵墨西哥，但演出卻惹人好感，更喺三分鐘先開紀錄，若非下半場自己擺烏龍洩咗道氣，有權搶分成功，事實上，北韓喺四年前曾打入世少盃十六強，更打和過英格蘭，可見北韓喺青少年足球級別絕非魚腩。


荷蘭以青訓聞名，今次入選嘅球員當中，大部分都係來自阿積士、燕豪芬及飛燕諾三大球會，但佢哋山長水遠去到中美洲，似乎唔太適應，上仗對剛果共和國頗多失誤，進攻頻頻斷纜，對住踢法以體力化見稱嘅北韓，未必佔到甜頭。