棟悉先機：火燎腚谷戰最勁

魑魅魍魉

　　今晚場地狀況如果受到天雨影響，唔爆至出奇嘞！有啲馬賽前可能以為冇乜機會，正正因為場地一有唔同，擺在前走，會有意想不到嘅好處，呢啲例子我哋成日會見到，唔係咩大新聞。唔好怪阿棟長氣，除非好有心水，唔係嘅話，揀放頭馬點都會有利。

　　第三場四班1200米。「清脆利落」連續3場在谷草1200米上名，曾經喺此程同過啲幾叻嘅馬交手，如「田園名駒」和「勁闖駒」，至此仍未有馬贏，其實係有啲失望。而今仗寧用大師傅，肯放個徒弟仔出去，為咩先？唔通明知冇磅減都唔介意！至於我就認為係隻馬唔易騎，因陣上常常難穩定走勢，所以，希望搵阿倫韁繩搭夠。希望排3檔，早段可且戰且走，藉着地慢，直路可走甩對手。

　　第六場三班1000米。「火燎腚」上場跑到甩口，成績係點，唔使介意，之前此馬在谷草已有上佳賽績，本身級數在三班不會比下去。今場轉回1000米，其實比1200米更啱，查實，前仗唔係早段放得太快，根本已有三甲。今場負磅與該役一樣，而場地卻不同，如果此馬唔係抗拒慢地，佢早段放得開心，末段唔易過番佢。

　　第八場三班1650米。「開心自在」上場初跑谷草一哩得殿軍，雖然，以直路早段勢頭，唔贏都應該要有位置，諗深一層，首次跑到咁長，都係唔好咁苛求。而此駒已轉到方廐多時，今時今日先至用愛將柏寶，擺明係想交代，而從前呢對人馬曾有美滿成績，好鬼合拍，呢次再聚，或可擦出火花。

點買法

　　因為揀3匹馬都來自方廐，買W要兩匹就算，「清脆利落」及「開心自在」比較鍾意。而QT場次則要尾場，揀番啲熱門配腳，如１、５、１１，如再諗冷門，可考慮２及３號。

資深評馬人　陳華棟