洪禮賢講馬：康駿好球不老英雄大將福星 魔幻大師大衛精神漸信良駒福喜

魑魅魍魉

　　谷草C欄賽事一旦受到雨勢影響，除非擅於雨中作賽嗰類馬，如果唔係，後上馬形勢直線下降，唔理內檔外檔一樣如是觀，大家要小心。

重心場次　第6場　第三班（80-60分）1000米

　　「千兩寶寶」上賽休出已交出三班段速，唔擔心今次唔夠班。雖然冇咗小將讓磅，用韋達，在運用速度上會更放心，只要唔係淋地水皮，放到。

　　「同心威駿」計時間，上賽慢放冇P（比當晚四班仲要慢），印象分扣晒，但縮程、2檔及慢地，如果拍住前駒大家揨住放，可能有位置。「紅旗勇將」之前見過地慢影響有幾大，成熱要小心。「延續美麗」兩仗前跑到錯晒唔大敗，演出至今難忘，今排6檔，只要唔差得過嗰場，已有權入圍。「火燎腚」成日一放難收，由於在一對快馬開便，恐早段走急咗。「軍策令」跑短二百米更好追。

第1場　第五班（40-10分）1200米

　　「威威加瑪」贏谷閘有兩腳，有埋1檔，形勢同試閘時差唔多，希望唔係睇得唔打得。「京城孖寶」速度唔係班內對手可比，終肯回到谷草，用埋柏寶，12檔照揀。

　　「不老精英」倘情緒唔係有波動，閘前或比賽時能安穩，根本係超班馬。「駿盈」和「千笑」，有資格爭P。

第2場　第四班（60-40分）1650米

　　「定做」比對近兩仗跑法，上場更放膽跟前啲，效果幾好，估計今場1檔兼韋達，發揮唔會回塘，跟得順，有本錢出頭。「真奇寶」純粹貪內檔及地利，計能力則係退緊。

　　「安瑪」及「劍鋒」，近仗跑盡都係贏唔到，除非淋地幫好多。「天下寶」腳痛後，要博現在好番幾多。「愛蓮說」跑谷草排內檔好少冇成績交出。「康莊大道」又係要博出閘以及陣中聽唔聽話。

第3場　第四班（60-40分）1200米

　　「枕住贏」上場後追上名，轉到款能力增值。今仗9檔則未必留得太後，脾性因已受操控，就算擺得前，末段料仍會夠貫注。「清脆利落」唔叻，可取在跑法及路程性能。

　　「好友星威」分數好「虛」，轉倉如搞得掂，轉場都夠贏。「百利旺」、「宇宙良駒」及「紅褲子」，俱有邊線機會，三揀一，要班底最厚嘅後駒。

第4場　第四班（60-40分）2200米

　　「康駿」及「好球」，跑法上在今場比較靈活，1隻可早段跟前，另1隻可中段竄上，而此程亦證明有長力，一併考慮。

　　「大將福星」有冇必要喺上場1800米，頭兩段搶得咁快（比同日四班1400米還快），真係好有保留！但見之前採守好位騎法（谷草1800米），曾有唔錯追勢，若此程更合性能，可爆。「正榮」、「不老英雄」，站於路程及慢地性能，後駒較有根據。

第5場　第四班（60-40分）1650米

　　「南陽望族」唔擔心耐冇出，上賽已揀，返嚟僅輸冇得講，希望唔係唔襟搏，應有補中能力。「新領袖」上場冇一段跑得啱，完全唔使理！都係以再之前跑得好賽績去計算。

　　「追月」係睇隻腳有冇事，計能力四班點會唔超。「奔騰飛駒」偶有慢閘，而後追跑法亦唔着數，不過同場再可選擇之馬已不多。「回鄉精神」係怕冇兩劑。

第7場　第三班（80-60分）1200米

　　「威威多星」及「御將軍」，最有冠軍相，前駒賽前安排兩大閘，有晒洩火程序，如唔係因耐冇跑，令陣上難操縱，當有贏面。後駒贏完例冇，的確幾驚，好在加磅唔多、1檔及淋地，寄望可破盲門。

　　「清風送爽」1200米比1000米合適得多。「大旋風」及「至尊飛飛」要跑得好好才有上名機會。「一路奇兵」太輕磅，加上係休出第2仗，唔會冇得爭。

第8場　第三班（80-60分）1650米

　　「魔幻大師」再加重至131磅，如果又用近兩仗嗰種過火嘅放頭跑法，可能埋唔到尾。「大衛精神」以總場次238同程入Q水準，有番正常發揮，三班唔使睇人面色。

　　「開心自在」上場出彎後好靚位，但最後冇P，的確失望。「漸信良駒」剛仗老襯，自己搵錯位塞死，換人而轉程，再畀機會。「福喜」及「華倫天奴」，一對馬因應跑法及近績，可兼顧。

馬會賽馬節目主持　洪禮賢