美國新西蘭睇定嚟食

魑魅魍魉

25/06/2011


世少盃進行得如火如荼，周日凌晨會上演C組同D組嘅第三輪分組賽，D組形勢可謂亂過亂世佳人，四隊都係同得三分，即係話每隊都有機會出線，呢一輪可以話相當關鍵，值得留意係美國同新西蘭出線形勢極佳，兩隊今仗碰頭，如果打和極大機會一齊出線，會唔會打默契波？真係要(目及)實喇！




未講波先介紹吓賽制，二十四支球隊分六組，除每組頭兩名出線外，仲有四支成績最好嘅小組第三名出線，D組美國同新西蘭依家有三分，兼且得失球同為「+2」，如果佢哋各得一分而同組另一場烏茲別克同捷克打和嘅話，美國同新西蘭就會以首、次名出線，即使「烏捷」分出勝負，美國同新西蘭打和，亦有機會以較佳成績小組第三出線，所以兩隊今場隨時嘆慢版，睇住嚟食！


英格蘭可望吐「烏」氣


C組方面，形勢就簡單得多，烏拉圭兩戰兩勝得六分，已提早出線，今仗對英格蘭可能會畀部分主力休息，上仗意外被加拿大逼和嘅英格蘭則有望攞番個尾彩，至於加拿大對盧旺達，咪以為盧旺達兩戰兩敗好渣，其實踢落一啲都唔曳，今場有機會擊敗加拿大！