瑞士鋼鐵防線

魑魅魍魉

25/06/2011
文： 朱楓

今晚U21歐國盃爆發終極決戰，瑞士會同西班牙爭冠軍。「小鬥牛兵」表面睇好似勁啲，實情瑞士喺今屆賽事未輸過兼一球不失，西班牙面對瑞士條鋼鐵防線隨時老鼠拉龜都似，朱楓睇好瑞士開出2.2倍「讓球主勝」！（now633及660台周日凌晨2:45直播）




賽前已被譽為奪標大熱嘅西班牙，最終如球迷所願殺入決賽。睇番「小鬥牛軍」晉級過程，分組賽B組以首名出線，前鋒阿祖安盧比斯暫時仲以5球排射手榜首位，不過上場4強對白俄羅斯喺先失1球下，受制對方嚴密防守，最終幾經辛苦先喺完場前逼和對手，再喺加時入多兩粒奠勝，唔多唔少反映西班牙前線唔算太銳利，面對死守球隊冇必勝把握，今晚想繼88年後第3度捧走U21歐國盃冠軍睇嚟唔係咁易。


西班牙最怕死守


瑞士近年青訓極之出色，繼09年捧走世少盃冠軍後，今屆更歷史性殺入U21歐國盃決賽。其實佢哋今屆表現比西班牙仲要勁，分組賽3戰全勝，上場加時贏02年冠軍捷克1:0後，今屆賽事入咗6球未失1球，難怪領隊譚美賽後大口氣到發表奪標宣言，揚言未驚過西班牙。


瑞士一球未失臥虎藏龍


事實上，瑞士人腳唔曳，好多都効力德甲同意甲，當中中場新星梳頓沙基利上年踢過世界盃，之前對英格蘭射入過世界波，喺U21級別明顯超班，上場對捷克，史浩克前鋒加雲洛域同09年世少盃銀球獎得主賓卡利法都要做後備，睇得出瑞士陣中臥虎藏龍，何況中場主將格列沙加今仗刑滿復出，射手美密迪又當弗，就算有後防阿科達因傷肯定缺陣，都有本事喺法定時間保持不敗。


瑞士8場不敗


‧近8場5勝3和，對上4場均保持清白。




‧近2次交手獲1勝1負，打成均勢。

西班牙旺開雙

‧之前曾4度殺入決賽，但只有2次成功封王。

‧近8場3勝4和1負，對上6場5度開細及雙。

近5屆決賽戰果

年份 冠軍 戰果 亞軍

2009 德 國U21 4:0 英格蘭U21

2007 荷 蘭U21 4:1 塞爾維亞U21

2006 荷 蘭U21 3:0 烏克蘭U21

2004 意大利U21 3:0 塞爾維亞及黑山U21

2002 捷 克U21 0:0 法國U21（12碼捷贏3:1）