棟悉先機：般若換將破蛋

猪拉多纳

　　天氣熱辣辣，日日都係30幾度，真係食嘢都冇胃口。不過，如果喺馬場散播「熱氣」，我又覺得幾正！熱門馬跑出，受惠嘅係大眾，唔使人人口糠糠。希望今日喺田草A欄作賽，熱門實力馬能相繼抬頭，因時近季尾，馬友們係時候開始努力搵唞暑費嘞！

　　第三場四班1400米。「般若」跑了3場1400米，依然入唔到三甲，係咪過分期望？我唔排除有咁嘅可能，不過，仍堅持認為隻馬唔係水貨，假以時日，莫講話四班，上三班有馬贏亦係預料之中。而深入睇過佢近兩仗此程的表現，嚴格嚟講，覺得騎者未完全發揮到隻馬十成功力，唯一希望係今仗換人，韁繩及功架唔同之下，起到化學作用，可同三零身分講bye-bye。

　　第六場四班1600米。「進攻足球」剛仗大熱門身分不入前五名，成績的確差強人意，是否賽後驗到嘅右後腳跖骨割傷，就係演出失準嘅元兇，總之，佢近仗之中，跑得最差嗰兩場就係谷草賽事。今仗回到田草1600米，究竟有冇高估佢，係時候揭盅。

黃金年代唔簡單

　　第八場三班1000米。同場之中，太多太多好馬，「鷹之團」、「勁闖駒」、「太極至尊」、「黃金年代」、「競駿寶寶」等等，真係好唔捨得唔揀晒佢哋。至於揀W的話，「黃金年代」係首選，除咗因為上場潘頓喺鞍上大動肝火，令到阿棟好記得之外，上賽受阻後，能夠短時間修正而贏得番，呢匹3歲仔嘅潛藏真係唔嘢小，有賠率值得博多場！

點買法

　　上述3匹馬之中，我自己最鍾意「般若」，冇理由之前有份輸，今仗如換人贏，會冇份啩，一於捧埋今場，而W連扣則要埋「黃金年代」。重心QT場次揀第八場，擸晒一批實力馬應該搵到食。

資深評馬人　陳華棟