洪禮賢講馬：冷W次數多 大盃唔腳軟 韋達今季有「進步」

猪拉多纳

　　本年度「最受歡迎馬匹」、「最受歡迎騎師」及「最受香港馬迷欣賞海外馬匹」，已於月中接受投票，正如早前馬會新聞稿所言，鑑於今季增加越洋轉播賽受馬迷歡迎，增設最受欣賞海外馬匹，此舉確係值得讚賞。而預咗兩匹吸票能力好爆嘅「火箭人」及「魚子精華」，目前雙雙透出，但勢估唔到有份參加選舉嘅「范高爾」和「飛雪仙蹤」，現時會落後咁多選票啫。

　　而「最受歡迎騎師」，通常係韋達季尾最後擸嘅1個獎項，睇走勢除非有乜「依郁」，唔係幾難唔落入佢手。事實上，佢今季喺好幾方面都有「進步」，譬如贏冷門次數多咗，係咁意數數都有十隻八隻冷W（上季100W之中，得3駒係10倍或以上），好似「友瑩果」、「心中有程」、「太陽海岸」，全部係廿幾三十倍獨贏。

　　同時，喺大賽表現再冇咁「脆」，港澳盃、女皇盃、主席錦標等盃賽，畀佢贏得到，至少證明自己唔係跑親大盃都腳軟！

　　寫寫吓選舉，自己忽然「閃靈」，唔知將來會唔會有「最受歡迎練馬師」嘅獎項？如果有，我諗好多華籍練馬師吸票能力唔嘢少，就以今季為例，姚本輝、葉楚航、徐雨石、伍碧權等馬房，各有賣點！其實選情方面，有時未必一定係成績最好嗰個就贏，記得當年柏寶夥拍「牛精福星」贏安田，最後咪做埋嗰年最受歡迎騎師。

馬會賽馬節目主持　洪禮賢