洪禮賢講馬：文柏配大熱作T膽 僅7%失望率

猪拉多纳

　　之前曾經講過，數據嘅嘢可以兩面睇，而點樣睇啲數據亦因人而異。譬如，季內有好幾對騎練組合，各擁唔錯嘅合作紀錄（有terms情況下），如姚黎配、蔡韋配、文柏配等等，如果善用到佢哋嘅「好處」，直接增加投X時勝算，未至於百戰百勝，起碼唔會趨凶避吉！

　　先講姚本輝和黎海榮，佢哋喺谷草合作馬如成大熱門，好少會失拖，季內12駒之中，只得1駒冇前四名（贏了5駒），如果一睇數字，可能有人會話：「唓，都贏唔到一半或以上，邊算及格呀！？」假如係專買獨贏嘅人，有咁嘅立場，完全冇錯。問題係如果睇上述數據嘅人係專攻四連環呢項彩池，情況可以唔一樣。嘩，用佢哋嘅大熱門做膽嚟買四連環，12次僅得1次唔掂，成功率係91%！

　　而文家良及柏寶，今季嘅大熱門成績亦係幾「爆」，前前後後15匹，交到7冠3亞4季。若果全數攞嚟做三重彩複式馬膽的話，只有唔夠7%機會令我哋失望。

　　此外，韋達騎蔡廐馬，經常成為大熱門，單講今季喺田草1400米，曾先後有19駒捧成大熱門，佢哋交出嘅成績，唔睇過都唔知咁「爆」！有16駒順利跑入前兩名，即係話，有接近85%入到Q。假如喜歡逢大熱必飛嘅嗜冷馬友，喺1400米場合，遇到韋蔡配嘅大熱門，唔撞板機會咪只得1成多啲咋。

馬會賽馬節目主持　洪禮賢