玻國勁搭長途車

猪拉多纳

01/07/2011


玻利維亞喺今屆賽事被視為陪跑分子，事實上，大會喺分組賽編排真係玩謝佢哋 ，三場分組賽去晒唔同城市，仲要由南去北，再由北去南，淨係坐飛機等行李都攰死。




玻利維亞喺A組原本同阿根廷、哥倫比亞及哥斯達黎加一組已經好難踢，佢哋揭幕戰對阿根廷喺中部城市拉普拉塔（La Plata）舉行，跟住就要北上胡胡伊（Jujuy）踢第二場對哥斯達黎加，最衰嘅係哥斯達黎加首戰就喺呢度踢，人哋就休養生息，玻利維亞就頻撲到死。


委內瑞拉同樣「被恰」


踢完第二場，玻利維亞又要南下返中部城市聖菲（Santa Fe）對哥倫比亞，同樣哥倫比亞對上一場又喺聖菲踢，如果以行車距離計，玻利維亞總共要坐2,791公里車，差唔多由香港去到哈爾濱咁遠。




同樣情況喺B組嘅委內瑞拉身上發生，佢哋先喺拉普拉塔對巴西，再去北部城市薩爾塔（Salta）對厄瓜多爾，最後又返中部嘅科爾多瓦（Cordoba）對巴拉圭。