撐阿根廷贏「玻」「主勝」攞頭威

猪拉多纳

01/07/2011
文： 朱楓

等到頸都長，美洲盃聽朝終於爆發揭幕戰，由東道主阿根廷迎戰玻利維亞。阿根廷為破18年無盃魔咒，史無前例徵召最強人腳應戰，賽前仲事先張揚，表明今場會派「三斯戟」攻堅，一無高原就腳軟嘅玻利維亞試問點頂得住？朱楓認為阿根廷今場就算（-2），開1.85倍「讓球主勝」仍綽綽有餘！（有線61、64、201及中央5台周六早上8:45直播）




南美勁旅阿根廷近年畀死敵巴西恰到應，連續兩屆美洲盃決賽都輸畀對手屈居亞軍，為報呢個仇兼終結18年大賽錦標荒，領隊巴迪斯達今次徵召所有海外主力歸隊，當中一直被傳同巴迪斯達及美斯有心病嘅泰維斯都有入選，結果呢位前鋒亦不負所託，早前對阿爾巴尼亞一場熱身賽入波後更攬住美斯慶祝，可謂連最大問題都消除埋。


美斯+泰維斯+拿維斯煞食


賽前阿根廷被西班牙《馬卡報》爆出今仗正選陣容，如外間所料將踢433陣式，當中美斯會同泰維斯、拿維斯合組三叉戟。雖然泰維斯同拿維斯射術可能冇希古恩同阿古路咁勁，但勝在夠勤力，拍住球王美斯，威力可能仲大！


玻利維亞卡士輸晒


自「魔鬼」艾茲華利退休後，玻利維亞近年成績冇好過。事實上，呢支南美球隊一向靠高原搵食，63同97年作為主辦國即取得一冠一亞，不過一冇咗主場之利就周不時首輪出局。




睇番玻利維亞今屆大軍陣容，主要以効力國內球會嘅球員為主，海外球員最出名就係効力薩克達嘅馬些路摩連奴，但所謂雙拳難敵四手，何況依家對嗰隊仲要係粒粒皆星嘅阿根廷，今鋪真係隨時輸個「主其他」都唔奇！