哥倫比亞猛火 「主勝」玩得過

猪拉多纳

02/07/2011
文： 朱楓

要數今屆美洲盃最勁奇兵，朱楓一定揀哥倫比亞，淨係一個歐霸盃神射手法卡奧已經夠殺，再加埋古亞連同前鋒洛達列加，呢個進攻鐵三角完全超晒班，今晚喺A組對住哥斯達黎加B隊，相信可輕鬆打響頭炮，「讓球主勝」有1.98倍認真抵玩！（有線61、64及201、中央5台周日凌晨2:30直播）




已經沉咗好耐嘅哥倫比亞，近年突然湧現唔少新星，好似今屆參加美洲盃，哥國23人大軍竟然有18人効力海外球會，當中最出名肯定係法卡奧，呢位前鋒今季極速上位，喺歐霸盃仲破埋奇連士文嘅入波紀錄，難得今次同波圖嘅好拍檔古亞連繼續合作，加埋韋根射手洛達列加，火力絕對有保證。


唔識死踢352實聽炒


係，効力法甲尼斯嘅門將奧斯賓拿喺練波嗰陣被洛達列加撞爆鼻臨時退隊，不過朱楓仍然對哥倫比亞嘅防線好有信心，皆因仲有耶比斯、佩利亞、辛尼加同保羅艾美路4位効力歐洲4大聯賽球員鎮守，搞到近期盛傳獲多間歐洲大球會垂青嘅沙柏達華倫西亞都要打後備，就知哥倫比亞條防線有幾堅啦！




哥斯達黎加相反係今屆美洲盃備戰工夫最弱嘅球隊，事關佢哋係臨時頂替日本參賽，早前踢金盃嘅海外主力，好似川迪射手拜仁雷斯都冇份參加，取而代之係一班U23球員，本來効力荷甲阿爾克馬爾嘅門將艾華拉度係隊中為數不多嘅有級數球員，點知呢位明日之星喺賽前因為毆打女友，結果被法庭禁止出境。哥斯達黎加本身人腳已經麻麻，但據講佢哋喺今屆美洲盃仲會打352陣式，對住哥倫比亞班殺手，怕且輸2粒都係最低消費！


哥倫比亞對賽佔優


‧近8戰3勝2和3負，全部開入球細。




‧近6次交手全勝之餘，其中2次更贏4:1。

哥斯達黎加後防曳

‧近8戰2勝5和1負，對上3仗勁失6球。

‧世界排名55，比對手哥倫比亞低1位。

美洲盃賽制

12支球隊分3組進行分組賽，每組4隊採單循環制，每組前2名及2支最佳成績第3名球隊將進身半準決賽。2支最佳第三名球隊，計算方法與小組排名準則相同。8強至決賽階段均以一場決勝負，若90分鐘賽和不設加時，即互射12碼分勝負。