柏雷素爾受讓做採花賊

猪拉多纳

02/07/2011
文： 走肖

唔識入波邊有得贏？大阪櫻花今晚喺日職主場對柏雷素爾，讓平半要唔過。今季櫻花火力大倒退，前鋒乾貴士又扭計轉會得咗手未必肯搏，全隊狀態同士氣都相當曳，相反柏雷素爾升班後高踞榜首，射手田中順也更加大爆發瘋狂入波，有佢壓陣下盤抵博。（now633及660台周六晚6:00直播）




上季櫻花重返日職，首先有中鋒卡奧費菲臘比離隊，跟住王牌香川真司過檔多蒙特，今年暑假又有射手阿祖安奴費拉拿轉投大阪飛腳，攻擊力難免大減，淨係睇櫻花開季踢12場聯賽得15個入球，落得2勝6和4負收場就知道唔對路。


櫻花火力唔掂主將扭計


原本被寄予厚望嘅乾貴士因為同教練古爾比不和，一度被雪藏連續4場冇得踢，雖然佢表面已經認錯近兩場被解凍，仲喺主場對鯨魚嘅比賽入波，但佢認衰無非係想落場騷哥利博轉會，古爾比肯用番佢，似係受到球會壓力，希望將佢賣個好價錢，兩個口和心不和唔似惡得出樣。




據講，波琴已正式開價收購乾貴士，佢收到風可以走人未必仲肯搏。柏雷素爾就唔同呢，升班後有9勝1和3負，射手田中順也上星期對甲府風林梅開二度，個人「6戰7發」（近6場入7球）順到無倫，連日本教頭沙哲朗尼都要搵佢幫手，有得踢國家隊喎，入開波梗係唔好畀佢停啦！