洪禮賢講馬:熱倒冷爆經常發生 賽馬從來冇易過

猪拉多纳

　　日前收到讀者蔡先生來信（感謝來信作交流），他指出每當馬季去到尾聲，賽事硬係難猜透、冇得秤、難賭等等。同時，他認為，季初可從馬匹狀態着手，及至季中，看狀態之餘，還可留意部署，惟於季尾階段，充斥一大批搏來搏去未勝之馬，根本難以釐定實力。

　　不過，從蔡先生嘅字裏行間，感覺得到佢係1位好理性嘅馬迷，事關他不苟同甚麼以前啲馬易賭！因年代不同，制度有別，引入嘅賽駒亦不像以前，勢力均勻之下，始會令人覺得難賭。

　　站於個人立場，其實唔會覺得邊1個年代易賭過。廿三四年前開始接觸賽馬（如冇記錯，第1匹捧場嘅馬係「富貴子」），從告東尼、魯賓遜年代，及至馬場警察雷誠，再數落去南非嘅馬佳善、韋達等，只係人物及賽駒唔同之嘛，熱門輸，冷門爆，根本經常發生。如果拉勻計，目前嘅一哥韋達，表現出嘅穩定性，其實已經幾好（季內佢嘅大熱門上名率為64%）。 至於某些場合會爆冷，好多因素形成，就如日前第九場賽事，幾匹有飛嘅熱門或有根據之馬，各有唔同問題發生，「有盈有利」略為留得後，「財運」初跑1800米莫氣，「馬主光輝」長直路唔掂，「神州八號」慢閘，「佳景良駒」賽後有痰等等，喺1場裏面成堆實力馬冇晒，賽果唔爆先至奇！