巴西挪威擺姿細

猪拉多纳

03/07/2011
文： 麥馬拿仁

女子世界盃D組重頭戲，巴西女足硬撼挪威女足。巴西「女球王」瑪達及主力姬絲蒂安妮首戰冇料到，整體表現毫無霸氣，今仗佔唔到幾多甜頭。挪威平穩有餘攻力不足，雙方今仗打和都收貨，預計唔會冒進，捧細盤。（有線64台周一凌晨零時15分直播）




巴西被捧為本屆女子世界盃三大奪標熱門之一，但首戰同好多勁旅一樣，表現於水準之下。瑪達名氣極大，但對澳洲時冇段好睇，被嘜到一戙都冇，全場射門次數寥寥可數，令人極度失望。而姬絲蒂安妮更令捧場客扯晒火，腳腳飛機浪費晒。睇番「女森巴兵團」整體演出比美國同德國都曳，就算經過首戰熱身，球員壓力稍減，但都唔好望佢哋有飛躍演出，未必咬得入挪威。


挪威加強防守放悶氣


挪威係女子足球傳統強國，但同瑞典一樣已不復當年勇，今次世界盃前有多名主力因傷未能隨隊，首戰對被視為同組最弱嘅赤道畿內亞，如非對手鋒將艾安曼屢誤戎機，分分鐘先落後一至兩球，最後挪威都係靠對手尾段散晒，先贏到一粒。挪威上仗因輕敵而幾乎贏唔到，又深知自己攻力麻麻，今場肯定加強防守，分分鐘悶戰完場。此外兩軍賽前已有三分在手，今仗唔輸就極大機會攜手出線，雙方小心為上，開細正路。


賽制


分組賽階段：16支球隊分4組，每組4隊，採單循環制，每組首、次名將進身8強。分組賽出現同分，將以下列方法定名次：1.總球差　2.總入球數　3.有關隊伍的對賽得分　4.有關隊伍的對賽球差　5.有關隊伍的對賽入球數　6.公平競技得分（黃、紅牌計算）　7.抽籤




淘汰賽階段：法定時間內打和，將加時30分鐘，再和則以互射12碼決勝。




積分表截至7月2日