四千萬優化浸鹹水

猪拉多纳

03/07/2011
文： 波男

近年中港足球同陷困局，青訓失敗係死結，香港足球有個「鳳凰計劃」，重點之一係加大青訓力度，成果係點起碼要等十年八年，反而中國足協就舊橋翻新推出「浸鹹水計劃」，送班o靚仔去歐洲受訓，期望幾年後有嘢睇。


中國足協再大搞青訓


保送球員出外受訓，早喺九十年代已經用過，就係派成支青年軍去巴西受訓四年，即係李瑋峰同李金羽嗰批，學成歸來個個做晒大球星甚至球霸，成為國足主力，效果唔錯。




可惜中國足協並冇繼續送第二批、第三批球員出外，據波男所知，其中牽涉錢銀瓜葛，有一個講法，當年贊助商喺每個球員身上使咗三十萬人仔，球員回國後每次轉會，贊助商都要收番三十萬人仔「培育費」，球星淪為提款機，成件事變晒質，所以中國足協亦冇再搞落去。




十幾年來青訓大失敗，迫使中國的起心肝再搞「浸鹹水計劃」，據說今次計劃係優化版，目的地唔再係巴西，而係分散投資，保送三十個Ｕ17球員去荷蘭、葡萄牙、西班牙等青訓成熟嘅歐洲球會受訓，為期三年，投入資金高達四千萬人仔，由一間大企業贊助。




至於球員歸屬問題中國足協亦諗好晒，成班球員索性盡歸贊助商所有，希望班o靚仔得到更好照顧，專心學踢波。




香港足總一度財困，相反中國足協就庫房水浸，可用資金高達五億元人民幣，佢哋搞青訓嘅速度同效率，當然快香港幾條街啦！