烏拉圭轟炸秘魯

猪拉多纳

04/07/2011
文： Mic少

美洲國家盃C組，烏拉圭迎戰秘魯，烏拉圭進攻人才輩出，由蘇亞雷斯、卡雲尼及科蘭組成嘅鋒線鐵三角，屬於世界頂級，一般南美球隊防守力都係麻麻，今項賽事更加有利呢三位射手發揮。秘魯以本土聯賽球員為骨幹，陪跑居多，建議要烏拉圭2.1倍「讓球主勝」。（有線61及201台周二早上6時15分直播）




烏拉圭上年打入世界盃四強，皆因三位前鋒科蘭、蘇亞雷斯及卡雲尼有出色發揮。雖然科蘭過去一季水準有所下降，但蘇亞雷斯及卡雲尼愈戰愈勇，尤其効力拿玻里嘅卡雲尼上季能夠喺強調防守嘅意甲射入26球，非常唔簡單，至於蘇亞雷斯幫助利物浦起死回生，大家亦有目共睹，以兩人精湛射術，要撕破秘魯防線，實在冇難度。


秘魯雙箭缺陣冇得揮


另一邊廂，秘魯進攻人腳原本都唔錯，但雲達不來梅射手比沙路及史浩克04前鋒法芬都因傷未能入選，令球隊實力大打折扣，想入波要靠晒漢堡前鋒荷西古里路，但佢始終獨力難支，好易被對手凍結，難怪上月兩場熱身賽，都入唔到波。




事實上，秘魯今次大軍名單只有四位球員効力歐洲球會，球員大賽經驗及足球視野都唔可以同烏拉圭相提並論，今場輸少當贏。