智利大蝦細炒起墨西哥

猪拉多纳

04/07/2011
文： 麥馬拿仁

美洲國家盃C組賽事，「大人」智利恰硬「細路」墨西哥！墨國贏完美洲金盃後畀主力休息，今次派U23國家隊戥腳娛賓，成隊只有杜斯山度士夠卡士，八名國腳嫖客被逐回國後弱上加弱；智利精銳盡出，阿歷斯山齊士大勇唔只贏一粒，直取2.4倍「讓球主勝」！（有線61台周二早上8時45分直播）




墨西哥接連參加美洲金盃同美洲國家盃，足總諗過度過，以強陣出戰衞冕美洲金盃，最終求仁得仁奪標，到今個大賽就以U23小將應戰，有晒心理準備當炮灰。本身有傳卡路士韋拿會參戰，但最終僅得杜斯山度士撐場，其他都係名不見經傳嘅國內年輕球員。墨西哥本身實力已經曳，一班o靚仔賽前仲唔生性走去召妓，最終八名球員包括杜斯山度士細佬莊拿芬杜斯山度士被逐出隊，令人腳愈來愈曳，分組賽三戰分分鐘全軍盡「墨」！


進攻三叉戟具威脅


智利去年世界盃表現惹人好感，於「狂人領隊」比爾沙打造下，大踢全攻型足球，十六強不敵巴西無話可說。前小保加教練波基今年接手後，球隊不再有前冇後，四場熱身賽兩勝兩和僅失一球，演出對辦。智利前線有近期轉會市場第一號搶手貨，身價直達四千萬鎊嘅烏甸尼斯殺手阿歷斯山齊士壓陣，首仗遇弱必全力爭取大勝。