洪禮賢講馬:吉利大師 谷戰攞A

猪拉多纳

　　第六場三班1200米。對於「吉利大師」，上賽前有樣嘢諗唔通，明明嗰晚賽期之後，有場曾勝嘅田草1200米可供選擇（嗰組賀廐冇馬報名），偏偏被安排谷草作新嘗試。而賽前試谷閘有睇頭亦覺應分（如果試得唔好，更加唔信會轉場），總之，就有個問號存在。至於跑落則比預期還要好，喺大半程三叠在後，直路仲要抄外檔衝，可以交到段22.54秒拉士（當晚8場賽事第二快），跑入殿軍而輸唔到兩乘，本來已幾叻，再睇埋喺前面嗰3匹馬，全數係季內三班至少累積1W1P嘅中上級分子，以整體表現嚟講，大致已反映到佢目前進度喺三班谷草夠贏嘞。今次等到A欄再跑此程，希望偏差冇咁大，令後追跑法冇蝕得咁緊要，若果因應至少有三數駒會放頭，營造較利後上形勢，有望贏得季內第2W。

　　第七場二班1200米。「活力至寶」今季係得兩場跑得差，其中1場喺賽後第2日驗到腳痛，另1場則係跳班兼轉場，餘下場場都喺前四名返嚟，以佢嘅A級穩定性而言，上到二班已經唔覺冇得跑。再睇埋上場頭馬水準，喺佢身後嘅二至四名，全部唔係啱啱贏完三班，就係再出即勝，以咁嘅賽績放喺今場，其實係上風馬至真！