英格蘭「+1」好路

猪拉多纳

05/07/2011
文： 笛子波童

在德國舉行的女子世界盃B組最後一輪分組賽，英格蘭女足鬥日本女足，日本兩戰全勝已肯定出線，今場和波便可以奪首名，「讓球主客和」日本讓一球唔抵玩，而英軍一樣有機會爭首名，加上上仗反勝新西蘭，全隊信心返晒嚟，而英軍和波都次名出線，波童捧1.67倍英格蘭「讓球主勝」。（有線61台周三凌晨零時15分直播）




日本頭兩輪擊敗新西蘭及墨西哥提早出線，而且射入六球為暫時各隊之冠，今場佢哋只要保持不敗便可奪得首名資格，由於A組賽事稍後時間才舉行，東道主兼衞冕冠軍德國未知會以首名或次名晉級，所以日本今仗應該唔存在走線問題。




日本上仗大勝墨西哥，某程度因兩者踢法非常接近，日本在個人技術及組織均遠勝對手，但今場對手英格蘭身材高大，料有較多埋身肉搏，日本在身體對抗性上明顯輸蝕。




英格蘭去仗於落後下反勝新西蘭二比一，一掃首仗被墨西哥逼和悶氣，而且整體演出及信心明顯回勇，形勢上對日本只係五五波。英格蘭雖然和波已肯定能以次名出線，不過只要佢哋擊敗日本，便能取代對方首名資格，故此絕對唔會揸流攤，咁嘅情況下英軍有得受讓實在好抵玩。


墨國求大勝博奇迹


同時間另一場B組賽事，新西蘭女足對墨西哥女足，新西蘭兩戰俱敗已無緣出線，純粹為尊嚴而戰。墨西哥想出線除要大勝對手，亦要望英軍不敵日本，故此亦冇保留餘地必定搶攻，捧大最划算。