棟悉先機：六六駿駒轉場着數

猪拉多纳

　　今晚8場谷草A欄賽事，大摩與告東尼大鬥法，由於目前仲未完全分到勝負，只差3場頭馬，邊位做練馬師冠軍仍言之過早。而今期前者兵力勝在準，後者有兩駒用到韋達，擺明唔係湊熱鬧，預料呢兩個馬房喺今晚必然有攻勢，嘜實佢哋唔應該會錯得去邊。

　　第四場四班1650米。「六六駿駒」馬性影響了成就，唔係經常性慢閘，或者比賽時難控制，老早應該有點成績交出。近兩仗其實佢仲係錯緊，出閘反應唔好，直路既唔多願跑直線，又要騎到出盡力先肯衝，不過，隻馬連續兩場追得唔錯，看來進度已比前跨進一步。由於轉場關係，適唔適應到係要博，之不過，對手唔同晒亦係事實。只要佢場地性能唔係太差，陣上又唔好錯咁多，與此等對手交手，應該佔上風。

佳同1200米拿手

　　第六場三班1200米。「佳同」上場轉到田草1400米一試，其實無不可，跑落則冇預期咁好，守好位情況之下，返嚟P都冇。今仗即刻返到拿手路程，阿航嘅心意畫晒出腸，肯加番眼罩更加似樣。係就係重磅啲，如有7、8倍，玩吓WP無妨。

　　第七場二班1200米。「活力至寶」係咪仲有好大上升空間，阿棟有多少保留，不過，鍾意隻馬有樣好，就係演出連貫性唔錯，縱使今季賽績係有波動過，但唔係冇原因，論到整體成績嘅穩定性算係中上嘞！另一方面，大摩目前爭冠軍最關鍵時刻，肯攞啲新勝馬出嚟，而唔提早安排唞暑，為咩先？正路咁諗，當然係繼續搏。


　　點買法：由於「六六駿駒」及「佳同」條件好似冇「活力至寶」咁優勝，如果買W，我寧願博後駒，贏位兼投理想對象。連贏及三重彩場合，亦係揀埋第七場，拖番幾匹實力馬，好似2、4、7、8。


陳華棟