澳洲挪威大打出手

猪拉多纳

06/07/2011
文： 走肖

今晚女子世盃D組生死戰澳洲對挪威，肯定搏甩髀，上屆兩隊踢成1:1，澳洲結束連續3屆分組賽出局命運，首次躋身8強，今屆肯定唔想衰番轉頭，至於挪威就要保住參賽以來未試過分組賽出局招牌，點會唔搏？兩隊夠殺氣一於捧2.1倍入球大。（有線64及中央5台周四凌晨0:00直播）




上屆以1:1完場，唔代表今屆開唔到入球騷，特別係澳洲女足近年好似拎咗飛躍進步獎咁，上年仲拎埋女子亞洲盃冠軍，佢哋喺上場仲銳意加強攻擊力，派埋17歲翼鋒薩曼花卻爾打正選，結果攻到赤道畿內亞女足有氣冇碇抖，上屆攻入4球嘅射手迪雲娜都有1球進帳，帶挈澳洲女足以3:2贏波，依家佢哋同挪威女足同得4分，就算今場和波都能夠以較佳得失球差壓倒對方出線，所以唔見得會死守。




對家方面，挪威女足過去5屆至少入8強，95年仲拎埋冠軍，以往女子世盃出戰17場分組賽，更加有13勝1和3負，證明佢哋實力唔嘢少，同埋唔鍾意拉布開和局。


挪威喺外圍賽喪入波


雖然上屆攻入6球嘅射手古布蘭森，07年已退出國家隊，但爛船都有三斤釘，挪威女足喺歐洲區外圍賽取得7勝1和，喪入39球相當唔簡單，當中射手靴露芙遜個人攻入9球，包括對馬其頓女足連入6球，有潛質做新入球機器，對住唔算穩陣嘅澳洲女足後防，為爭出線自然加多兩錢肉緊。