洪禮賢講馬：谷草尾場霎時「變色」 聰明注碼又發功

猪拉多纳

　　賽事之中，喺賠率出現啡格及綠格並唔出奇，中與不中係後話，牽涉任何1匹馬都好，獨贏、位置、連贏及位置連贏總有機會霎時「變色」。喜歡跟飛照買嘅馬友，久唔久真係搵到食，記得4月尾「神州八號」贏2000米嗰場，開跑前呢匹馬啲注碼嚟得既急又多，而零零舍舍成個Q位版塊，係得搭「高友勁」嗰瓣係啡格Q，結果呢對馬一Q返，仲係末段彈甩晒嗰種。如果嗰場有份跟啡格嘅馬友，40幾倍Q便告得手。

　　喺啱啱嗰期谷草尾場賽事，「目光如炬」嘅注項又發揮功力！未開賽之前幾分鐘，同直播兩位拍檔傾開，如呢場揀邊線冷門，「勁高手」會係優先選擇，初跑谷草又如何，咁準而有十倍獨贏畀大家去博！說時遲，那時快，筆者已「身先士卒」，以1膽拖幾瓣買Q，好記得「勁高手」WP未倒水咁落之前，佢搭「四季」嗰瓣連贏，本來已熱過「喜蓮智星」搭「四季」條Q，但當時「勁高手」獨贏賠率幾乎係「喜蓮智星」1倍，比例上唔多啱數。

　　而呢個現象帶出兩個問題，其一，1 9Q特別多飛（原來隔晚曾經係大熱Q）；其二，「喜蓮智星」搭好幾瓣Q位，票數唔夠硬淨。而賽果正好解釋晒，點解1匹初跑谷草馬，會咁有號召力。

馬會賽馬節目主持　洪禮賢